«Azamat» ıntellektýaldy baǵdarlamasynyń fınaly: jeńimpaz anyqtaldy
ASTANA. KAZINFORM – «Habar» telearnasynyń 30 jyldyǵyna oraı jańartylǵan formatta efırge qaıta oralǵan «Azamat» ıntellektýaldy baǵdarlamasy qorytyndylanyp, maýsym jeńimpazy anyqtaldy.
Fınaldyq oıynda Halel Dosmuhamedov atyndaǵy Atyraý ýnıversıteti men Kenjeǵalı Saǵadıev atyndaǵy Halyqaralyq bıznes ýnıversıtetiniń komandalary kezdesti. Aqtyq kezeńniń taqyryby – «Qazaqstan ekonomıkasynyń basty draıveri».
Fınal barysynda komandalar óz pozıtsııalaryn dáleldeý, qarsy taraptyń ýájine jaýap berý jáne logıkalyq argýmentatsııa turǵysynan joǵary daıyndyq deńgeıin kórsetti. Tartysty ótken oıyn nátıjesinde 3:2 esebimen Halel Dosmuhamedov atyndaǵy Atyraý ýnıversıteti jeńiske jetip, «Azamat» ıntellektýaldy baǵdarlamasynyń jeńimpazy atandy.
Fınaldyq oıyndy QR Parlamenti Májilisiniń depýtaty Ashat Aımaǵambetov, Ǵylym jáne joǵary bilim mınıstri Saıasat Nurbek, «Respublica» partııasynyń tóraǵasy Aıdarbek Qojanazarov, «Habar» agenttigi» AQ Basqarma tóraǵasy Kemelbek Oıshybaev jáne Qazaq Debate qozǵalysynyń negizin qalaýshy Erbolat Muhamedjan baǵalady.
Joba qorytyndysy boıynsha yntalandyrý syılyǵy – 250 myń teńgeden Shákárim ýnıversıtetine, Ál-Farabı atyndaǵy Qazaq ulttyq ýnıversıtetine, Qazaq ulttyq qyzdar pedagogıkalyq ýnıversıtetine jáne Narhoz ýnıversıtetine tabystaldy.
Tórtinshi oryndy jáne 400 myń teńge júldeni Abaı atyndaǵy Qazaq ulttyq pedagogıkalyq ýnıversıteti ıelendi. Úshinshi oryn – Qudaıbergen Jubanov atyndaǵy Aqtóbe óńirlik ýnıversıtetine (600 myń teńge). Ekinshi oryn jáne 1 mıllıon teńge júlde Kenjeǵalı Saǵadıev atyndaǵy Halyqaralyq bıznes ýnıversıtetine buıyrdy. Al birinshi oryn men 2 mıllıon teńge júldeni Halel Dosmuhamedov atyndaǵy Atyraý ýnıversıteti jeńip aldy. Osylaısha, jobanyń jalpy júlde qory 5 mıllıon teńgeni qurady
Aıta keteıik, «Azamat» ıntellektýaldy baǵdarlamasy alǵash ret 2000-jyldardyń basynda «Habar» telearnasynda efırge shyǵyp, eldegi pikirsaıys qozǵalysynyń damýyna serpin bergen jobalardyń biri boldy. Jańartylǵan maýsym aıasynda elimizdegi 100-den astam joǵary oqý ornynyń ishinen iriktelgen 32 ýnıversıtet qatysty.Eskerte keteıik, qazirgi tańda «Azamat» ıntellektýaldy baǵdarlamasynyń ekinshi maýsymyna irikteý bastalyp ketti. Jańa maýsymǵa elimizdiń joǵary oqý oryndary qatysa alady.