Azamat Esqaraev Dúnıejúzilik zııatkerlik menshik uıymynyń basshysyna «Aport» usyndy
Ádilet mınıstri Azamat Esqaraev 5 shilde kúni Jeneva qalasynda Dúnıejúzilik zııatkerlik menshik uıymynyń bas dırektory Daren Tangpen kezdesti. Mınıstr Qazaqstannyń geografııalyq kórsetkishin nasıhattaý jáne ilgeriletý maqsatynda kezdesýge qatysýshylarǵa «Aport» shyryndy almasynyń dámin tatýdy usyndy. DZMU ókilderi almanyń dámi men hosh ıisin baǵalap, olardyń joǵary sapasy men biregeıligin atap ótti.
Geografııalyq kórsetkish – belgili bir geografııalyq aımaqtarda óndiriletin ónimder úshin tıimdi qorǵanys jáne artyqshylyq quraly. «Aport» alma sortyn geografııalyq kórsetkish retinde tirkeý birqatar artyqshylyqty qamtamasyz etedi.
Eń aldymen, bul – biregeılikti qorǵaý. Geografııalyq kórsetkish Qazaqstannyń naqty óńiriniń belgili bir tabıǵı jáne klımattyq jaǵdaılaryna baılanysty «Aport» almasynyń biregeı sıpattamalary men sapasyn qorǵaýǵa múmkindik beredi. Bul basqa jerde ósirilgen almalar úshin «Aport» ataýyn teris paıdalanýǵa jol bermeıdi.
«Aport» alma sortyn geografııalyq kórsetkishter tizimine qosý osy sorttyń naryqta tanylýyn arttyrýǵa yqpal etedi jáne tutynýshylardyń senimin arttyrady. Olar «Aport» almasynyń túpnusqalyǵy men sapasyna senimdi bolady jáne ónimdi geografııalyq kórsetkishi boıynsha ońaı anyqtaı alady.
Sonymen qatar, geografııalyq kórsetkishti qorǵaý jáne ilgeriletý aýyldyq jerlerdi damytýǵa, jumys oryndaryn qurýǵa, sondaı-aq halyqaralyq naryqta ónimdi jyljytýǵa yqpal etedi.
Ádilet mınıstri A. Esqaraev «Aport» alma sortyn geografııalyq kórsetkishter tizimine engizý aýyl sharýashylyǵyn damytýda jáne óndirýshilerdi qoldaýda mańyzdy ról atqaratynyn atap ótti. Bul bastama ekonomıkalyq ósýdi, týrızmdi damytýdy yntalandyrady, óndirýshilerdiń quqyqtaryn qorǵaıdy jáne Qazaqstanda almanyń biregeı sorttaryn damytýdy qoldaıdy.
