Azamat Dáýletbekov – Azııa chempıonatynyń úsh dúrkin jeńimpazy

BІShKEK. KAZINFORM – Erkin kúresten Qazaqstan quramasynyń úzdigi Azamat Dáýletbekov qatarynan úsh dúrkin Azııa chempıony atandy. 

86 kelide synǵa túsken Azamat fınalda ózbekstandyq Jabraıl Shapıevti 5:2 esebimen jeńdi. Osylaısha ol óz salmaǵynda úsh dúrkin Azııa chempıony atandy. 

Buǵan deıin Azamat Dáýletbekov Azııa chempıonatynan bólek, álem birinshiliginde eki ret qola júldege qol jetkizgen. 

Aıta keteıik, endi qazaqstandyq balýandar arasynda búgin Talǵat Syrbaz (74 keli) qola júlde úshin beldesý ótkizedi. 

Al, 13-14 sáýir aralyǵynda áıelder, 15-16 sáýirde grek-rım sheberleri bozkilemge shyǵady. Azııa birinshiliginde erkin kúres, grek-rım jáne áıelder kúresinen jalpy jıyntyǵy 30 medal sarapqa salynady. 

Eske sala keteıik, buǵan deıin erkin kúresten qazaqstandyq eki balýannyń fınalǵa shyqqanyn jazǵan bolatynbyz.