Azamat Aıtqojın Qazaqstan fýtbol federatsııasynyń bas hatshysy qyzmetine taǵaıyndaldy
ASTANA. QazAqparat - Qazaqstan fýtbol federatsııasynyń Atqarýshy komıteti bas hatshy qyzmetine Aıtqojın Azamat Serikulyn taǵaıyndady. Ol osy ýaqytqa deıin Qazaqstan fýtbol federatsııasynyń atqarýshy dırektory qyzmetin atqaryp keldi. Bul týraly federatsııanyń baspasóz qyzmetinen habarlandy.
Azamat Serikuly 1975 jyly 15 mamyrda Tselınograd qalasynda dúnıege keldi. Ol sporttyq qyzmetin 2003 jyly Qajymuqan Muńaıtpasov atyndaǵy stadıonnyń dırektory bolyp bastady. Keıin «Jeńis» fýtbol klýbyna jetekshilik etip, komandamen birge QR chempıonatynyń qola júldesi jáne Qazaqstan Kýbogyn jeńip aldy. Sonymen qatar, Astana qalasynyń týrızm jáne sport departamentiniń basshysy boldy.
2007-2009 jyldar aralyǵynda «Astana Arena» sport kesheniniń dırektory qyzmetin atqarǵan. Sondaı-aq, «Jastar» sport saraıyn basqardy. Keıin «Astana» fýtbol klýbynyń prezıdenti bolyp, komandasymen birge Qazaqstan Kýbogyn jeńip alǵan bolatyn.
