Azamat Aıtqojın «Astana» fýtbol klýbynyń úndeýine qatysty: Aıyptylar jazalanady
ASTANA. QazAqparat - Qazaqstan fýtbol federatsııasynyń Bas hatshysy Azamat Aıtqojın Premer-lıganyń 17-týrynda qostanaılyq «Tobylmen» ótken oıynnan keıin «Astana» fýtbol klýbynyń jasaǵan málimdemesine qatysty pikir bildirdi, dep habarlaıdy QazAqparat.
«Búgin, 9 shilde kúni Tóreshiler komıtetiniń otyrysy ótedi. Jıynda Danııar Sahı bastaǵan tóreshiler tobynyń qyzmeti saralanyp, qorytyndy shyǵarylady. Tóreshilerdiń jumysynda birjaqty sheshim qabyldaǵany baıqalatyn bolsa, onda aıyptylar jazalanady. Sonymen qatar, Qazaqstan fýtbol federatsııasynyń Tártiptik-baqylaý komıteti «Tobyl» - «Astana» matchynyń qatysýshylarynyń tártibin qarap, sheshim shyǵarady. Olardyń da kinási bolǵan jaǵdaıda sanktsııa qoldanylýy múmkin», - dep keltiredi Azamat Aıtqojınniń sózderin QR fýtbol federatsııasy.
Atap ótilgendeı, «Tobyl» men «Astana» arasyndaǵy oıynnyń negizgi sátteri Qazaqstan fýtbol federatsııasynyń Ádep komıtetiniń aldaǵy otyrysynda da qaralatyn bolady.
«Qazaqstan fýtbol federatsııasy komıtteriniń jumysy machtardyń mártebesine qaramastan úzilissiz qyzmet atqaryp keledi. Sol sebepti fýtbol klýbtarynyń mundaı sátterdi medıa-keńistikke shyǵaryp, qoǵamdy dúrliktirýdiń qajeti joq dep sanaımyn», - dedi ol.
Eske salaıyq, 5 shilde kúni Qostanaıdaǵy Ortalyq stadıonda "Astana" - "Tobyl" matchy ótken bolatyn. Oıyn 0:0 esebimen teń aıaqtaldy.
Alaıda, keıin «Astananyń» resmı saıtynda atalmysh klýbtyń sporttyq dırektory Aleksandr Konochkınniń úndeýi jarııalandy. Konochkın bul kezdesýde tórelik aldyn ala kesip-pishilgenin atap ótti. Sondaı-aq «Astanaǵa» qarsy sóz baılasýdyń anyq-qanyǵyn ashý úshin kúsh qurylymdary vedomstvolaryn iske qosatynyn aıtty.
Klýbtyń sporttyq dırektory Qyzyordadan kelgen basty arbıtr Danııar Sahı men onyń kómekshileriniń biliksizdigin taıǵa tańba basqandaı etip dáleldeıtin matchtan vıdeoúzindiler daıyndap qoıǵanyn málim etti.
«Biz Qazaqstan fýtbol federatsııasy men Qazaqstannyń kásipqoı fýtbol lıgasyna hat daıyndap, kezdesýdiń basty arbıtri Danııar Sahıdiń jáne onyń kómekshileri - Sergeı Vasıýtınniń (Almaty) jáne Sergeı Kalachevtiń (Atyraý) áreketterine baǵa berýdi suraımyz. Tórelik etýshi brıgadanyń jumysy aldyn ala kesip-pishilgenin boljaıtyndaı bizde barlyq negiz bar. Biz Qazaqstandaǵy matchtarda qyzmet etý quqyǵynan Danııar Sahıdi shettetýge kúsh salyp, sonymen birge atalmysh referımen úshinshi tulǵanyń keliskeni týraly kúdigimiz dáleldense kúsh qurylymdaryn iske qosamyz», - degen bolatyn A.Konochkın.
