Azamat Ámrın: Jańa Salyq kodeksi bıýdjet túsimderin 3-3,5 trln teńgege arttyrýy múmkin

ASTANA. KAZINFORM – Ulttyq ekonomıka mınıstriniń orynbasary Azamat Ámrın Parlament palatalarynyń birlesken otyrysynda jańa Salyq kodeksi bıýdjeti kiristerin qanshalyqty arttyratynyn aıtty.

- Aldaǵy úsh jyldyń boljamyna kelsek, shynymen de bıýdjetti qalyptastyrý protsesi bastalyp ketti. Biz shyǵyndar lımıtin aıqyndadyq. Al bıýdjet kirisi makroekonomıkalyq parametrler negizinde qalyptasatynyn bilesizder. Oǵan 2024 jyl men bıylǵy kórsetkishter negiz bolýy shart.

Qosymsha túsýi múmkin túsimderge kelsek, jańa salyq kodeksindegi jańashyldyqtardyń bári esepter kezinde eskeriledi. Aldyn ala derek boıynsha, jyl saıyn 3-3,5 trln teńge bolady, - dedi ol.

Vıtse-mınıstrdiń sózinshe, bıyl keıingi 12 jylda alǵash ret 5 aıda JІÓ ósimi 6 paıyz bolyp otyr.

- Tipti geosaıası faktorlardyń saldarynan týyndaǵan munaı men shıkizat baǵasynyń qubylýyna qaramastan, ósim qarqynyn saqtaý múmkindik bar. 7 aıdyń qorytyndysy shyqqannan keıin, qyrkúıekte naqty esepti kóre alasyzdar, - dedi mınıstrdiń orynbasary.

Aıta keteıik, Úkimet úıinde Parlament palatalarynyń birlesken otyrysy ótip jatyr.