Azamat Ámrın: Jańa Salyq kodeksi bızneske jańa paraqtan bastaýǵa múmkindik beredi
ASTANA. KAZINFORM – Astanada jańa Salyq kodeksiniń normalaryn túsindirýge arnalǵan dóńgelek ústel otyrysy ótti. Іs-sharaǵa memlekettik organdardyń, bıznes-qoǵamdastyqtyń, máslıhat depýtattarynyń jáne ekinshi deńgeıli bankterdiń ókilderi qatysty.
Talqylaýdyń basty taqyryby – 2026 jylǵy 1 qańtardan bastap kúshine enetin jańartylǵan Salyq kodeksi jáne onyń kásipkerlikke áseri boldy. Ulttyq ekonomıka birinshi vıtse-mınıstri Azamat Ámrınniń aıtýynsha, jańa qujat salyqtyq ákimshilendirýdi edáýir jeńildetedi: eseptilik kólemi 30%-ǵa, salyqtar sany 20%-ǵa qysqarady. Sonymen qatar biryńǵaı jer salyǵy joıylyp, artyq tólemder men jeńildikter ońtaılandyrylady.
– Arnaıy salyq rejımderiniń sany úsheý ǵana qalady: ózin-ózi jumyspen qamtyǵandar úshin, jeńildetilgen deklaratsııa negizinde jáne fermerlik sharýashylyqtar úshin. Ózin-ózi jumyspen qamtyǵan azamattar salyqty mobıldik qosymsha arqyly eseptep, tóleı alady, – dedi Ámrın.
Ol sondaı-aq, 44 qyzmet túri boıynsha tyıym salynǵan qyzmetterdiń jańartylǵan tizimi daıyndalǵanyn atap ótti. Tizimge alkogol men qarý-jaraq óndirisi, aktsızdeletin jáne qarjy sektory sııaqty baǵyttar kirdi.
– 2026 jyldan bastap salyqtyq ákimshilendirý kásipkerlerge “jańa paraqtan bastaýǵa” múmkindik beredi. Mıkrobıznes úshin tekserý men salyq júktemesi azaıady. Bizdiń basty maqsatymyz – bızneske qolaıly jaǵdaı jasaý jáne onyń damýyn yntalandyrý, – dedi Azamat Ámrın.
Qarjy vıtse-mınıstri Erjan Birjanov óz kezeginde 1,9 mıllıon salyq tóleýshi arnaıy rejımde jumys isteý múmkindigin saqtaıtynyn aıtty.
– Buryn kásipkerler jalpy rejımge kóshýden qorqatyn. Endi bul másele sheshildi, arnaıy rejım aıasynda ózara esep aıyrysý kezinde shekteýler bolmaıdy, – dedi Birjanov.
Onyń málimetinshe, salyq tóleýshilerdi táýekel dárejesine qaraı sanattaý alynyp tastaldy, al eseptilik nysandary 30%-ǵa qysqartyldy. Eger deklaratsııa ýaqytynda tapsyrylmasa, ol nóldik kórsetkishpen berildi dep esepteledi.
– Ákimshilendirý rásimderi qaıta qaraldy. Mıkro jáne shaǵyn bıznes úshin negizgi qaryz ótelgen jaǵdaıda ósimpul men aıyppuldar esepten shyǵarylady. Bul jańa kodekstiń basty maqsaty – bıznestiń damýyn tejeý emes, ony yntalandyrý, – dedi Erjan Birjanov.
Aıta keteıik, 2026 jyly bankter Qarjy mınıstrliginiń qundy qaǵazdarynan túsken kiristen salyq tóleı bastaıdy.