Azamat Ámrın keler jyly kiristerdiń negizgi ósim faktorlaryn atady
ASTANA. KAZINFORM – 2025 jyly respýblıkalyq bıýdjet kiristeri 2,9 trln teńgege artady. Bul týraly Májiliste Ulttyq ekonomıka vıtse-mınıstri Azamat Ámrın aıtty.
«Makroekonomıkalyq kórsetkishterdiń boljamy negizinde 2025-2027 jyldarǵa arnalǵan bıýdjet pen Ulttyq qor parametrleriniń boljamy qalyptastyryldy. Respýblıkalyq bıýdjet kiristerin esepteý kezinde ótken jyldyń naqty oryndalýy jáne osy jyldyń alty aıy boıynsha baǵalaý qorytyndylary negizge alyndy. Bul rette, kirister 2025 jyly 15,6 trln teńge nemese jalpy ishki ónimge 10,4 paıyz deńgeıinde boljanady. Osy jyldyń baǵalaýymen salystyrǵanda ósim 2,9 trln teńgeni qurap, 2027 jylǵa qaraı 18,2 trln teńgege deıin nemese 16,4 paıyzǵa ósýi kútiledi», - dedi Azamat Ámrın.
Vıtse-mınıstrdiń dereginshe, 2025 jyly kiristerdiń negizgi ósýi kelesi faktorlarǵa baılanysty boljanady:
1,5 trln teńge – makroekonomıkalyq kórsetkishterdiń ózgerýi;
1,3 trln teńge – salyqtyq jáne kedendik ákimshilendirýdi jaqsartý;
595 mıllıard teńge – qosylǵan qun salyǵyn qaıtarý somasyn azaıtý;
306 mıllıard teńge – salyq salynatyn munaı eksporty kóleminiń ulǵaıýy;
78 mıllıard – teńgeniń AQSh dollaryna baǵamynyń ózgerýi.
«Salyq túsimderinde eń úlken úlesti qosylǵan qun salyǵy, korporatıvtik tabys salyǵy alady. Qosylǵan qun salyǵynyń aǵymdaǵy jylǵy baǵalaýmen salystyrǵanda 1,5 trln teńgege artýy nomınaldy jalpy ishki ónimniń ósiminen jáne salyqtyq ákimshilendirýdi jaqsartý esebinen boljanady. Korporatıvtik tabys salyǵy boıynsha ósim munaı emes sektordyń jalpy qosylǵan qunynyń ósýi jáne salyqtyq ákimshilendirýdi jaqsartý esebinen 1,8 trln teńgegi quraıdy. Halyqaralyq saýda jáne syrtqy operatsııalarǵa salynatyn salyqtardyń 276 mıllıard teńgege ulǵaıýy negizinen munaıǵa eksporttyq kedendik bajdyń ósýi esebinen boljanady. Salyqtyq emes túsimder 435 mıllıard teńge mólsherinde aıqyndaldy», - dedi ol.
Onyń aıtýynsha, osyny eskere otyryp, respýblıkalyq bıýdjettiń teńgerimin kirister bazasy esebinen qamtamasyz etý úlesi 2025 jyly 63,7 paıyzdy, 2026 jyly 75,0 paıyzdy jáne 2027 jyly 76,9 paıyzdy quraıdy.
«Jalpy, eger memlekettik bıýdjet aýqymynda qaraıtyn bolsaq, jergilikti bıýdjet kiristeri boıynsha oń dınamıka baıqalady. Asyra oryndalýy 2023 jyly 660 mıllıard teńge; 2024 jyly 800 mıllıard teńgeden astam kólemde baǵalanady. Bul sońǵy jyldary júrgizilip jatqan óńirlerdiń ózin-ózi qamtamasyz etýin arttyrýǵa baǵyttalǵan sharalardyń nátıjesi sanalady», - dedi vıtse-mınıstr.
