AZAL ushaǵynyń apaty: tergeý qorytyndysy qashan jarııalanady

ASTANA. KAZINFORM — Premer-mınstrdiń orynbasary Qanat Bozymbaev Aqtaýda Ázerbaıjan ushaǵynyń apatyn tergeý jumystaryna qatysty túsinik berdi. Osy oraıda ol bul baǵyttaǵy tekserý nátıjesi jaqynda jarııalanatynyn aıtty. 

Onyń sózine qaraǵanda, tergeý eki baǵytta iske asyryldy. Bas prokýratýra qylmystyq quramdy tergep jatyr. Al Kólik mınıstrligi avıatsııalyq apattyń ózin tekserdi.

— Kólik mınıstrligi tergeýdi aıaqtaýǵa jaqyndady. Qazirgi ýaqytta tehnologııanyń, aeronavıgatsııalyq quraldardyń jáne basqa jabdyqtarǵa lıtsenzııa berýshilerden nemese óndirýshilerden qorytyndy esep kútip otyrmyz. Jalpy, Kólik mınıstrliginiń tergeýin aıaqtaýǵa daıynbyz, ıaǵnı bıyl nemese kelesi jyldyń basynda nátıjesi shyǵady. Bas prokýratýraǵa toqtalsaq, onda da ilgerileý bar. Osy másele boıynsha kórshiles memleketter basshylarynyń tıisti málimdemelerin de kórdińizder. Sondyqtan kelesi jyly osy turǵydaǵy is-sharalar aıaqtalady dep úmittenemiz, — dedi Úkimet basshysynyń orynbasary.

Aıta keteıik, 25 jeltoqsanda Aqtaý mańynda Bakýden Groznyıǵa baǵyt alǵan AZAL jolaýshylar ushaǵy apatqa ushyraǵan bolatyn. 

Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.

Buǵan deıin ushaq apatynyń sebebi jyl sońyna deıin anyqtalatyny aıtylǵan edi.