AZAL Reseıdiń birneshe qalasyna reısterin ýaqytsha toqtatady
ASTANA. KAZINFORM - Bul týraly áýetasymaldaýshynyń baspasóz qyzmeti habarlady.
Azerbaijan Airlines (AZAL) Reseıdiń keıbir qalalaryna reısterin toqtatty.
– 25 jeltoqsanda bolǵan Embraer 190 ushaǵynyń apatyna qatysty tergeýdiń bastapqy derekterin, sondaı-aq Mıneralnye vody, Sochı, Volgograd, Ýfa, Samara, Groznyı qalalaryna ushý qaýipsizdigin qamtamasyz etý salasyndaǵy yqtımal táýekelderdi eskere otyryp jáne Mahachkalada 28 jeltoqsannan bastap is júrgizý túpkilikti aıaqtalǵanǵa deıin reıster toqtatyldy, - delingen habarlamada.
Buǵan deıin AZAL áýe kompanııasynyń J2-8717 reısi Baký – Mıneralnye Vody baǵyty boıynsha ushqannan keıin, Baký áýe keńistiginen shyqpaı-aq jáne Mahachkala áýe keńistigin jabý týraly habarlamany alǵan soń, keri qaıtý týraly sheshim qabyldaǵan bolatyn. Ushaq jergilikti ýaqyt boıynsha 10:13-te Geıdar Álıev halyqaralyq áýejaıyna aman-esen qondy.
25 jeltoqsan kún Bakýden Groznyıǵa bet alǵan Ázerbaıjannyń Azerbaijan Airlines kompanııasynyń Embraer ushaǵy Qazaqstannyń Aqtaý qalasyna jaqyn jerde apatqa ushyrady. Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza taýyp, 29 adam, onyń ishinde úsh bala aman qaldy.
Ázerbaıjan prezıdenti Ilham Álıevtiń jarlyǵymen 2024 jyldyń 26 jeltoqsany Ázerbaıjanda ushaq apatynda qaza tapqandardy eske alyp, Aza tutý kúni bolyp jarııalandy.
Aqtaýǵa Embraer áýe kemesin óndirýshi zaýyttan arnaıy ókilder kelgenin jazǵan bolatynbyz.