AZAL áýe kompanııasy keıbir baǵyttar boıynsha reısterdi toqtatty

ASTANA. KAZINFORM – Bul týraly áýe kompanııasy Telegram akkaýntynda málimdedi, dep habarlaıdy Kazinform tilshisi. 

— Azerbaijan Airlines áýe kompanııasynyń Baký-Groznyı-Baký jáne Baký-Mahachkala-Baký baǵyttary boıynsha reısteri tergeý amaldary aıaqtalǵansha toqtatyldy, — delingen habarlamada.

AZAL-dyń basqa baǵyttaryna reıster shtattyq kestege sáıkes júzege asyrylady. 

Aıta keteıik, tańerteń Aqtaý qalasynyń mańynda Ázerbaıjan astanasy Bakýden Groznyıǵa baǵyt alǵan ushaq apatqa ushyrady. 

Ushaq bortynda 69 adam bolǵan. Olardyń arasynda qazaqstandyqtar da bar. Qazir adamdardy qutqarý-izdestirý jumystary jalǵasyp jatyr.

Elimizdiń Tótenshe jaǵdaılar mınıstrligi usynǵan sońǵy málimetke sáıkes, apattan aman qalǵan 29 zardap shekken jan aýrýhanaǵa jetkizildi, onyń ishinde 2 bala bar.

Qaıǵyly jaıttan keıin Ázerbaıjanda 26 jeltoqsan Aza tutý kúni bolyp jarııalandy.

Aıta keteıik, Memleket basshysy Qasym-Jomart Toqaev ushaq apatynan zardap shekken azamattarǵa kómek kórsetýdi erekshe baqylaýda ustaýdy tapsyrdy.

Prezıdent tapsyrmasyna sáıkes Úkimet komıssııasy Aqtaýdaǵy ushaq apaty ornynda jumysyn bastady.