Aza tutý kúni: Jamandyqty amandyq qana jeńedi...
NUR-SULTAN. QazAqparat – Búgin, 10 qańtar – Qazaqstandaǵy Jalpyulttyq aza tutý kúni. Osynaý azaly kúnge oraı QR Parlamenti Májilisiniń depýtaty Darhan Myńbaı óz pikirin bildirip, «QazAqparat» HAA redaktsııasyna joldaǵan jazbasyn jarııalaımyz.
«Elimizdiń birqatar óńirinde bolǵan qaıǵyly oqıǵalardyń saldarynan ishki ister, áskerıler salasyndaǵy azamattarymyz ben beıbit turǵyndardyń qazasyna baılanysty 10 qańtarda Jalpyulttyq aza tutý kúni jarııalandy. Prezıdenttiń tıisti jarlyǵy shyqty. Memleket basshysy Qasym-Jomart Toqaevtyń bul sheshimi – eldi sabyrlyqqa, ımandylyqqa, aýyzbirshilikke shaqyrý sharasy. Yqylym zamannan san qıyndyq pen synaqty bastan keshirgen halqymyzdy qańtardaǵy qara quıyn qatty kúızeltti. Tótennen, bótennen kelgenderge tabalaýshy, elbuzarlar qosyldy. Halyqtyń jıǵan-tergeni shashyldy, yrys-nesibe rásýá boldy. Qalalarymyzǵa oıran salyndy, qan tógildi. Otan úshin árbir jannyń qazasy qasiretti. Kenetten qaıǵy arqalaǵan otbasylar men áýletterdiń barshasyna qaıǵyryp kóńil aıtamyz.
Ult ustazy Ahmet Baıtursynuly: «Asyqpańdar! Artymyzda qazy bar, Tergep talaı súıekteriń qazylar. Qınamaıdy abaqtyǵa japqany. Qıyn emes darǵa asqany, atqany. Maǵan aýyr osylardyń bárinen. Óz aýylymnyń ıtteri úrip, qapqany» degendeı syn saǵatta ishten shyqqan jaýyzdaq, alaýyzdyq pen arandatýshylyq elge aýyr tıdi. Álem nazaryna ilikken búlikshilik áreket Memleket basshysynan Konstıtýtsııaǵa saı ádilettilikti, salqynqandylyqty, jaýapkershilikti talap etti. Tıisti batyl qadamdar jasaldy, olar jalǵasatyn bolady. Osyndaı shıelenisti shaqta qıyndyqqa shydap, tózgen erdi, er eńbegin sezgen eldi tanydyq. Iá, bizge qazir sabyr qajet. Sabyr – senimniń arqaýy. Birlik kerek, ol – úmittiń, jaqsylyqtyń bastaýy. Osyndaı qaıǵy-qasiretti tereń sezine otyryp, qoǵam jaýapkershiligin, meıirimi men aýyzbirshiligin aıryqsha aıtamyz. Óıtkeni, bizdiń elimizdiń eń qymbat qazynasy – adam, onyń ómiri, quqyǵy men bostandyǵy. Biz qýanyshta da, qaıǵyda da birgemiz. Jaratqan ıe marqumdarǵa – ıman, tirilerge bereke bersin! Jamandyqty amandyq qana jeńedi. Ashyq aspanymyz endi eshqashan qara bult torlamasyn».
