Áz Jánibek sultanǵa arnap XIV ǵasyrda jazylǵan qoljazba tabyldy
ASTANA. KAZINFORM – Áz Jánibek sultanǵa arnap XIV ǵasyrda jazylǵan qoljazba tabyldy. Bul týraly Mádenıet jáne aqparat mınıstrligi habarlady.
1334 jyly Áz Jánibek sultanǵa arnap jazylǵan 96 bettik qoljazba tabyldy. Qoljazbada Áz Jánibek hannyń túpatasy Shyńǵys hannan óz ákesi Ózbek hanǵa deıingi atategi qysqasha altyn naqyshpen berilip, negizgi mátinde hıkmetter týraly baıandalǵan.
Qoljazbanyń ishki muqabasynda Osman sultany ІІ Baıazıdtiń (1447-1512) móri qoıylǵan. Atalǵan tarıhı murany QR Mádenıet jáne aqparat mınıstrliginiń uıymdastyrýymen «Arhıv-2025» keshendi jospary aıasynda Túrkııanyń Ystanbul qalasynda ótken ǵylymı-zertteý jumystary barysynda Ortalyq memlekettik arhıviniń qyzmetkeri, qazaq ǵalymy Ómirbek Qanaı anyqtady.
Qazirgi tańda asa qundy qoljazbanyń kóshirmesi Qazaqstanǵa jetkizilip, ári qaraı zertteý jumystary jalǵasyp jatyr.
