Az qamtylǵan otbasyndaǵy oqýshylardy áleýmettik qoldaýdy kúsheıtý kerek - depýtat

NUR-SULTAN. QazAqparat - Jeke mektepterde oqıtyn halyqtyń áleýmettik-osal tobyna jatatyn mektep oqýshylary áleýmettik qoldaýǵa muqtaj. Senator Nurlan Beknazarov Premer-Mınıstr Asqar Mamınniń atyna joldaǵan depýtattyq saýalynda osy máselege nazar aýdardy, dep habarlaıdy QazAqparat tilshisi.

Ol Bilim jáne ǵylymı mınıtrliginiń málimeti boıynsha elimizde 257 jekemenshik mektep bar ekenin aıtty. Onda 64 myńǵa jýyq mektep oqýshysy oqıdy. Olardyń bir toby áleýmettik az qamtylǵan otbasylardan shyqqan oqýshylar. Shymkent qalasyndaǵy ahýaldy tilge tıek etken Senat depýtaty búginde atalǵan qalada 34 jekemenshik mektepte halyqtyń áleýmettik osal tobyna jatatyn 7 myńǵa jýyq bala bilim alatynyn jetkizdi.

«Qazirgi ýaqytta memlekettik jalpyǵa mindetti bilim berý standarty aıasynda jan basyna qarjylandyrylatyn memlekettik bilim berý uıymdary men jekemenshik mektepterdegi bilim alatyn áleýmettik kómekke muqtaj sanatyndaǵy oqýshylardy oqýlyqtarmen, oqý-ádistemelik quraldarmen, kıim jáne bir rettik tamaqtandyrýmen qamtamasyz etýde teńsizdik oryn alyp otyr. Úkimettiń Qaýlysy talaptaryna sáıkes, aımaqtardaǵy bilim basqarmalary áleýmettik kómektermen tek memlekettik orta bilim berý mekemeleriniń joǵaryda atalǵan sanattaǵy oqýshylaryn ǵana qamtamasyz etedi», – dedi Nurlan Beknazarov Senattyń jalpy otyrysynda.

Osyǵan baılanysty senator jekemenshik mektepterde oqıtyn áleýmettik kómekke muqtaj oqýshylardy qarjylandyrý úshin qazirgi normatıvtik quqyqtyq aktilerdi talapqa saı keltirý qajet ekenin atap ótti.