Az qamtylǵan otbasylarǵa ıpoteka 2 paıyzben beriledi - Qarjy mınıstrligi

ASTANA. QazAqparat - QR Qarjy vıtse-mınıstri Tatıana Saveleva Parlament Májilisiniń depýtattaryna Qazaqstandaǵy turmysy tómen otbasylar baspanamen qalaı qamtylatynyn aıtyp berdi, dep habarlaıdy QazAqparat tilshisi.

Vıtse-mınıstrdiń aıtýyna qaraǵanda, bul baǵytta 2019 jyly 100 mlrd teńge bólingeli otyr. Bul sharalardyń bári de «Nurly jer» memlekettik baǵdarlamasy aıasynda eki baǵyt boıynsha júzege asyrylady.

«Birinshiden, kópbalalylar sanatyndaǵy az qamtylǵan otbasylar salý jáne kúrdeli jóndeý arqyly, satyp alý quqyǵynsyz jalǵa beriletin baspanaǵa qol jetkizetin bolady. Bul baǵyttaǵy qadam jyl saıyn 6 myń páterdi paıdalanýǵa berýge jol ashady», - deıdi Tatıana Saveleva Májilistegi Qazaqstannyń 2019-2023 jyldarǵa arnalǵan áleýmettik-ekonomıkalyq damý boljamyn naqtylaýǵa arnalǵan otyrysy barysynda.

Onyń aıtýynsha, az qamtylǵan, kópbalaly, tolyq emes jáne kirisi tómen ári múgedek balany tárbıelep otyrǵan otbasylardy «Turǵyn úı jınaq banki» arqyly áleýmettik nesıelik baspanamen qamtamasyz etý josparlanǵan.

«Mundaı otbasylarǵa 20 jyl merzimge jyldyq 2 paıyzben aldyn ala aralyq turǵyn úı nesıesi beriletin bolady», - deıdi ol.

Otyrys barysynda depýtattardyń suraqtaryna jaýap bere kele QR Indýstrııa jáne ınfraqurylymdyq damý vıtse-mınıstri Qaıyrbek Óskenbaev jalǵa beriletin úı kezeginde turǵan 28 myń adam baryn, onyń 4 800-i Túrkistan oblysynda turatynyn málim etti.

«Ekinshi orynda - Almaty oblysy. Ondaı sanattaǵy otbasylardyń eń azy - Soltústik Qazaqstan oblysynda (342). Olardyń bári de álbette aýdan ortalyǵynda turmaıdy. Tizimdi qazirdiń ózinde jasaqtadyq», - deıdi Qaıyrbek Óskenbaev.

Onyń aıtýyna qaraǵanda, jalǵa beriletin úı qurylysy úshin 50 mlrd teńge bólinedi.