Az qamtylǵan otbasydan shyqqan talantty balalardy zııatkerlik mektepte oqytýǵa grant bólinýi tıis - S. Jalmaǵambetova
ASTANA. Qyrkúıektiń 9-y. QazAqparat /Qanat Mámetqazyuly/ - Az qamtylǵan otbasydan shyqqan talantty balalardy zııatkerlik mektepte oqytýǵa grant bólinýi tıis. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Svetlana Jalmaǵambetova osylaı málim etti.
«Elimizde bilim júıesin jetildirý men damytýǵa baılanysty kóptegen sharalar júzege asýda. Sońǵy ýaqytta qurylǵan «Nazarbaev ýnıversıteti», «Nazarbaev zııatkerlik mektebi» sekildi bilim oshaqtary - elimizdiń zamanǵa saı bilim mekemelerin qurýdaǵy aıtýly qadamy. Biz buny tolyq qoldaımyz. Búgingi tańda Qazaqstanda bundaı 3 mektep bolsa, aldaǵy jyldary olardyń sany 20-ǵa deıin jetpek», - dedi senator.
Sonymen birge, depýtat alǵashynda zııatkerlik mektepterdegi oqý 7 synyptan bastalatyny jáne sol kezeńnen memlekettik granttar bólinetini qarastyrylǵanyn aıtyp, biraq sońǵy qabyldanǵan sheshim boıynsha ashylǵan 3 mektepte de oqýǵa qabyldaý 1-shi synyptan bastalǵanyn quptady. «Bul durys boldy, erte bastan bilimge ázirleý talantty balalardyń qabiletin damytýǵa járdemin tıgizedi. Degenmen, búgingi kúni bul mektepterde aqyly bilim berýge qatysty problema kóterilip otyr. Oqý aqysyn tóleý memlekettik bıýdjetpen birge ata-analar tarapynan da jasalady, onyń ústine bundaı mektepterdegi oqý baǵasy shapshań ósýde. Máselen, aǵymdaǵy jyly Kókshettaý qalasynda zııatkerlik mektepte oqý aqysy jylyna 240 myń teńgege, Astana qalasynda 300 myń teńgege deıin artty. Bul qandaı da bir ýnıversıtetke tólenetin mólsherden joǵary ári talantty balasy bar az qamtylǵan otbasynyń «qaltasy» buny kótermeıdi», dedi S. Jalmaǵambetova.
Osyǵan oraı, depýtat az qamtylǵan otbasylardyń talantty balalary úshin zııatkerlik mektepte oqý grantyn 1 -shi synyptan bastap engizý múmkindigin qarastyrýdy surady.
