Az qamtylǵan otbasy balalary mektepterde tegin tamaqtanady
ASTANA. QazAqparat - Az qamtylǵan otbasy balalary mektepterde tegin tamaqtana alady. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Bilim jáne ǵylym mınıstri Aslan Sárinjipov málim etti.
«Búginde az qamtylǵan otbasy oqýshylaryna qatysty júıe qaldyrylady. Áleýmettik jaǵynan az qamtylǵan oqýshylar jergilikti bıýdjettiń esebinen mektepte tegin tamaqana alady. Jyl saıyn oǵan jergilikti qarajattar qarastyrylyp otyrady. Ol júıe qalady», - dep atap ótti mınıstr.
Óz kezeginde QR Premer-Mınıstriniń orynbasary Berdibek Saparbaev oqýshylardyń tamaqtanýyn qamtamasyz etýge bıznesmenderdi tartý qajettigin tilge tıek etti.
«Jergilikti bıýdjetten oqýshylar tamaǵyna qajetti qarajatty qarastyrý kerek. Biraq sonymen qatar buǵan kásipkerlerdi de tartýymyz kerek. Ol negizinen az qamtylǵan balalarǵa qatysty», - dedi B.Saparbaev.
