Az ǵana ýaqyt ishinde Qazaqstan eshbir memlekette bolmaǵan qarqyndy ósimdi kórsetti - B. Maılybaev
ASTANA. 28 qyrkúıek. QazAqparat - Halyqaralyq sarapshylardyń baǵalaýy boıynsha az ǵana ýaqyt ishinde Qazaqstan eshbir memleket kórsete almaǵan qarqyndy ósimdi eńserip, Jahandyq básekege qabilettilik reıtınginde 51-orynǵa shyqty.
Búgin Astanada elimizdegi aqparattyq saıasatty damytýdyń mańyzdy máselelerine arnalǵan keńes barysynda sóz sóılegen QR Prezıdenti Ákimshiligi Basshysynyń orynbasary Baǵlan Maılybaev osylaı málim etti.
«Jaqynda Búkilálemdik ekonomıkalyq forým básekege qabilettiliktiń Jahandyq reıtıngi nátıjelerin jarııalady. Ol boıynsha Qazaqstan básekege qabilettiliktiń reıtınginde birden 21 pozıtsııaǵa kóterildi. Búgin Qazaqstan 51-shi orynda tur. Esterińizde bolsa, álemniń básekege barynsha qabiletti 50 eliniń qataryna kirý mindeti osydan 6 jyl buryn Memleket basshysymen júktelgen bolatyn. Bizdiń elimiz dál osy maqsatty eńserýdiń tabaldyryǵynda tur ári oǵan merziminen buryn qol jetkizbek. Bunyń daǵdarystyq qubylystarǵa qaramastan oryn alǵanyn da eskerýimiz kerek. Halyqaralyq sarapshylardyń baǵalaýy boıynsha az ǵana ýaqyt ishinde bundaı qarqyndy ósimdi eshbir memleket kórsete almaǵan», - dedi B. Maılybaev.
Onyń aıtýynsha, Jahandyq básekege qabilettilik kórsetkishterinde Qazaqstan «Ýnıversıtetter men bıznestiń yntymaqtastyǵy» krıterııi boıynsha 29 pozıtsııaǵa, «Personaldyń biliktiligin arttyrý» baǵytynda 24 orynǵa, «Memlekettik organdar sheshiminiń ashyqtyǵy» boıynsha 21 pozıtsııaǵa, «Ǵylymı-zertteý uıymdarynyń sapasy» boıynsha 13 orynǵa, «Bilim berý júıesiniń sapasy» boıynsha 11 pozıtsııaǵa joǵarylaǵan.
