Aıjan Qasymbektiń «Ot» atty fılmi Mınsk kınofestıvalinde baq synap jatyr
Festıval jumysyna qatysý úshin arnaıy saparmen barǵan «Qazaqfılm» kınostýdııasynyń prezıdenti Aqan Sataev búgin «Lıstopad» kınofestıvali aıasynda ótken dóńgelek ústelge qatysty.
TMD elderi kınogerleri ókilderiniń qatysýymen ótken bul basqosýda birlesken fılmderdi túsirý, sondaı-aq TMD elderinde ortaq kınoprokat júıesin qurý týraly máseleler talqylandy.
Aıta ketsek, búgin keshki saǵat 20:00-de (Mınsk qalasynyń ýaqyty boıynsha) «Tselınyı» kınoteatrynda «Lıstopad» kınofestıvali aıasynda QR Mádenıet jáne sport mınıstrligi tapsyrysy boıynsha, Sh.Aımanov atyndaǵy «Qazaqfılm» kınostýdııasy men Sataifilm kınokompanııasy birlesip túsirgen «Tomırıs» fılminiń arnaıy kórsetilimi ótedi.
Tarıhı kınotýyndyny fılmniń rejısseri Aqan Sataev pen basty róldi somdaǵan aktrısa Almıra Tursyn tanystyrady.
Qarashanyń 26-na deıin jalǵasatyn «Lıstopad» kınofestıvali barysynda kórermenderge 45 elden 100-den astam fılm (kórkem jáne derekti fılmder) usynylatyn bolady.
Festıvaldiń basty baıqaýynda 13 kórkem fılm baq synaıdy, olardyń qatarynda otandyq rejısser Aıjan Qasymbek túsirgen «Ot» fılmi de bar.
Atalǵan baıqaýdyń qazylar alqasynyń tóraǵasy belgili Reseı rejısseri ári prodıýseri Renat Davletıarov.
Erteń, qarashanyń 22-de festıvaldiń konkýrstan tys baǵdarlamasy aıasynda «Belarýs» kınoteatrynda «Ámire» fılminiń kórsetiledi. Týyndynyń rejısseri Djeff Vespa.
Sondaı-aq erteń Kınostýdııalardyń basshylary keńesi sheńberinde kınematografııa salasynda yntymaqtastyq jóninde kelisimge qol qoıý rásimi ótedi.
Bul sharaǵa 9 kınostýdııanyń basshylary qatysady.
«Qazaqfılm» delegatsııasynyń quramynda kınostýdııanyń vıtse-prezıdenti Aıdarhan Ádilbaev jáne óndiris bóliminiń basshysy Arýýana Serikbaeva bar.
1994 jyly Mınsk qalasynda alǵash ret ótkizilgen «Lıstopad» kınofestıvali 2002 jylǵa deıin TMD jáne Baltyq elderiniń halyqaralyq kınofestıvali bolyp ótkizilgenin aıta ketý kerek.
Bıyl festıval ulttyq «Belarýsfılm» kınostýdııasynyń uıymdastyrýymen ótkizilip jatyr.
