Aıjan Esmaǵambetova sibir jarasy aýrýyn juqtyrý máselesine qatysty túsinik berdi

ASTANA. QazAqparat – Bıyl Jambyl oblysynda turǵyndar arasynda kúıdirgi aýrýynyń 12 jaǵdaıy tirkeldi. Bul týraly Densaýlyq saqtaý vıtse-mınıstri – Bas memlekettik sanıtarııalyq dáriger Aıjan Esmaǵambetova aıtty, dep habarlaıdy QazAqparat tilshisi.

«2023 jyldyń ótken kezeńinde Jambyl oblysynda turǵyndar arasynda kúıdirgi aýrýynyń 12 jaǵdaıy tirkeldi. Barlyq jaǵdaıda indetti juqtyrýǵa aýrý maldardy soıý jáne bólshekteý, sondaı-aq osy etti tasymaldaý ári saqtaý sebep bolǵan», - dedi A. Esmaǵambetova Ortalyq kommýnıkatsııalar qyzmetindegi baspasóz máslıhatynda.

Bul turǵyda vıtse-mınıstr aýrýdan saqtanýdyń negizgi talaptaryna toqtaldy.

«Ruqsat etilmegen saýda oryndarynda et satyp almaý kerek. Sonymen qatar, etti durys pisirý mańyzdy. Eger aýrý maldyń janynda bolǵannan keıin shamamen 8 kún ishinde dene qyzýynyń joǵarylaýy, teriniń qyzarýy, jaralar paıda bolsa, shuǵyl túrde medıtsınalyq kómekke júginý qajet. Jalpy, malǵa profılaktıkalyq vaktsınatsııa jasaý kerek», - dedi Aıjan Esmaǵambetova.

Budan buryn habarlanǵandaı, Túrkistan oblysynda keıingi bes jylda 14 adam sibir jarasy ınfektsııasyn juqtyrǵan.