Aıjan Esmaǵambetova referendým kúnindegi qaýipsizdik is-sharalaryn atady

NUR-SULTAN. QazAqparat – QR Densaýlyq saqtaý vıtse-mınıstri Aıjan Esmaǵambetova referendým kúninde koronavırýs ınfektsııasynyń taralýyna jol bermeý úshin qandaı is-sharalardy saqtaý qajettigin aıtty, dep habarlaıdy QazAqparat tilshisi.

«Respýblıkada koronavırýs ınfektsııasy boıynsha epıdemıologııalyq jaǵdaı turaqty. Táýligine 10 jaǵdaıǵa deıin tirkelýde. Epıdemıologııalyq jaǵdaıdy baǵalaý matrıtsasyna sáıkes, 3 naýryzdan bastap respýblıka jáne barlyq óńirler jasyl aımaqta. Eldegi turaqty epıdemıologııalyq jaǵdaıdy eskere otyryp, barlyq karantındik shekteýler alyndy», - dedi vıtse-mınıstr Ortalyq saılaý komıssııasynyń otyrysy barysynda.

Sonymen qatar ol referendým ótkizý kezinde qandaı aldyn alý is-sharalaryn qamtamasyz etý qajettigine toqtaldy.

«Onyń ishinde: adamdardyń kóp jınalýyna jol bermeı, áleýmettik qashyqtyqty saqtap, referendýmǵa qatysýshylardyń tobyn retteý; bólmelerde jeldetkish nemese aýa baptaý júıeleriniń úzilissiz jumys isteýin qamtamasyz etý; aýany jasandy jeldetý júıesi bolmaǵanda bólmelerdi júıeli jeldetý; daýys berý aldynda jáne kúni boıy qajettiligine qaraı bólmelerdi jeldetý jáne dezınfektsııa júrgizý. Kórsetilgen is-sharalardy iske asyrý eldegi turaqty epıdemıologııalyq jaǵdaıdy saqtaýǵa múmkindik beredi. Atalǵan aldyn alý is-sharalary Bas memlekettik sanıtarııalyq dárigerdiń búgin osy otyrysta kelisýge shyǵarylatyn qaýlysynyń jobasynda jazylǵan», - dedi Aıjan Esmaǵambetova.

Otyrys barysynda QR Bas memlekettik sanıtarııalyq dárigeriniń arnaýly qaýlysy biraýyzdan qabyldandy.