Aıjan Esmaǵambetova nelikten vaktsınanyń qos komponenti kerek ekenin túsindirdi

NUR-SULTAN. QazAqparat – QR Densaýlyq saqtaý mınıstrligi sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova vaktsınanyń qos komponentin salýǵa qatysty túsinik berdi, dep habarlaıdy QazAqparat tilshisi.

«Spýtnık V» vaktsınasyn daıarlaýshylar koronavırýspen aýyryp shyqqandar ekpeniń tek birinshi komponentin saldyra alatynyn málimdedi. Keıbir elderde osyndaı tájirıbe eskerilgen, ıaǵnı indetten jazylǵandar vaktsınanyń bir ǵana komponentin alady. Qazaqstanda mundaı múmkindik eskerilgen be?», - dep surady tilshi Ortalyq kommýnıkatsııalar qyzmetinde ótken brıfıngte.

Óz kezeginde Aıjan Esmaǵambetova vaktsına tıisti bekitilgen ereje boıynsha jasalatynyn jetkizdi.

«Arnaıy erejege sáıkes, vaktsınanyń qosarlanǵan dozasy paıdalanylady, ıaǵnı birinshi jáne ekinshi komponenti qamtylǵan. Sondyqtan biz osy erejeni ustanamyz. Jańa málimetter paıda bolsa nemese tıisti ózgerister engizilse, onda ony qarastyramyz. Jalpy, Dúnıejúzilik densaýlyq saqtaý uıymy koronavırýs ınfektsııasyna qarsy eki dozany qamtýǵa keńes berdi», - dedi komıtet basshysy.

Budan buryn habarlanǵandaı, QR Densaýlyq saqtaý mınıstri Alekseı Tsoı koronavırýsqa qarsy vaktsınanyń birinshi jáne ekinshi komponenti qansha adamǵa salynǵanyn aıtty.