Aıjan Esmaǵambetova: Eldegi ahýal ár óńirdegi karantın tártibin qatań saqtaýǵa májbúrleıdi

NUR-SULTAN. QazAqparat – QR Memlekettik bas sanıtarlyq dárigeri Aıjan Esmaǵambetova keı óńirde koronavırýs juqtyrǵandardyń sanynyń azaımaı, tipti órship bara jatqanyna baılanysty halyqty taǵy da karantın tártibin qatań saqtaýǵa shaqyrdy, dep habarlaıdy QazAqparat tilshisi.

«Qazaqstanda qazirgi tańda koronavırýs juqtyrǵan azamattardyń aýrý belgisin baıqamaı nemese jeńil túrde kóteretinderdiń úlesi - 79 paıyz. Qalǵan 18 paıyzy aýrýdy ortasha jaǵdaıda bastan ótkerse, 21 adamnyń jaǵdaıy aýyr, al 2 adamnyń jaǵdaıy asa aýyr kúıde bolyp otyr», - dedi Aıjan Esmaǵambetova OKQ-da onlaın rejımde ótken baspasóz máslıhatynda.

Memlekettik bas sanıtarlyq dárigerdiń aıtýynsha eldegi statsınarlarda 1180 em alýda. Koronavırýs juqtyrǵan adamdardyń báriniń de jaǵdaıy baqylaýǵa alynǵan.

«Jalpy vırýs oshaqtarynda baılansta bolǵan 31 512 adam anyqtaldy. Onyń ishinde 30 850 adam (nemese 98 paıyzy) oqshaýlanǵan. Jalpy aýrýdy juqtyrý deńgeıi elde 15 paıyzdyq mólsherde. Alaıda keıbir óńirlerde bul kórsetkish 20-dan 60 paıyzǵa deıingi shamany kórsetýde. Bul jaǵdaı ár óńirde engizilgen karantın tártibin qatań saqtaýǵa májbúrleıdi», - dedi ol.