Aıjan Bitimbaeva arbadaǵy tennısten álemdik reıtıngide joǵary kóterildi

ASTANA. KAZINFORM – Halyqaralyq tennıs federatsııasy arbadaǵy tennısshiler arasynda jańartylǵan reıtıngini jarııa etti.

Qaraǵandy tennıs mektebiniń túlegi Aıjan Bitimbaeva ótken aptamen salystyrǵanda, álemdik reıtıngide 92-den 89-orynǵa kóterildi.

Qazaqstanda arbadaǵy tennıs 2022 jyldan beri damyp keledi. Osy ýaqyt ishinde TOP-90-ǵa ený – úlken jetistik.

Quramynda A.Bitimbaeva bar qazaqstandyq arbadaǵy tennısshiler jýyrda alǵash ret álem kýbogynyń Azııa irikteý jarysynda óner kórsetti.

Kolombo (Shrı-Lanka) qalasynda ótken jarysta Qazaqstan erler quramasy Irak, Iranmen, áıelder Japonııa, Úndistan jáne Qytaılyq Taıbeımen bir topta oınady.

Komandalyq álem chempıonatynyń fınaldyq kezeńine joldama almaǵanymen, qazaqstandyq arbadaǵy tennısshiler Azııadaǵy myqty quramalarmen básekege túsip, jaqsy tájirıbe jınaqtady.

Eske sala keteıik, budan buryn AQSh-taǵy týrnırde Býblık pen Kýkýshkınniń qarsylastarynan basym túskenin jazǵan bolatynbyz.