Aıjan Aımaǵanova zorlyq-zombylyqqa tosqaýyl qoıýdyń jańa tetigin usyndy

- Sońǵy jyldary elimizde áıelder men balalardy zorlyq-zombylyqtan qorǵaý baǵytynda mańyzdy sharalar qabyldandy. Jaýapkershilik kúsheıtildi, aldyn alý tetikteri keńeıtildi. Alaıda qaıǵyly jaǵdaılar áli de jalǵasýda. Keıingi birneshe aıdyń ózinde qoǵamdy dúr silkindirgen birneshe oqıǵa boldy. 13 shildede Abaı oblysynda 20 jastaǵy Dılnaz Jumaǵulova kóptegen pyshaq jaraqatynan mert boldy. 23 qyrkúıekte Astanada eki balanyń anasy Jazıra Adaýovany burynǵy jubaıy óltirdi. Osy oraıda «qoldanystaǵy qorǵaý tetikteri zorlyq-zombylyq bolǵannan keıin ǵana áreket etpeı, qaýipti aldyn ala anyqtap, onyń jolyn kesýge qanshalyqty múmkindik beredi?» degen mańyzdy suraq týyndaıdy. Oǵan qajetti quqyqtyq ta, tsıfrlyq ta múmkindikter bizde bar. Endigi mindet - sol múmkindikterdi tıimdi paıdalanyp, qaýipti der kezinde anyqtaý jáne adamnyń ómiri men qaýipsizdigin qorǵaý, - dedi Aıjan Aımaǵanova.

Onyń aıtýynsha, bul úshin jańa ári qymbat aqparattyq júıe qurýdyń qajeti joq. Qazaqstanda profılaktıkalyq esepke alý men elektrondyq baqylaýdyń qajetti tetikteri qazirdiń ózinde bar.

- Osyǵan baılanysty tıisti usynystardy jarııalamaqpyn. Birinshiden, Іshki ister mınıstrligi jekelegen óńirlerde «Elektrondy qorǵanys aımaǵy» pılottyq jobasyn ázirlep, synaqtan ótkizý tıis. Ekinshiden, qaýip týraly sıgnal túsken kezde, polıtsııanyń naqty ne isteýi kerektigin belgileıtin biryńǵaı mindetti algorıtm bekitý qajet. Úshinshiden, árbir qaýip sıgnaly jáne sol boıynsha qabyldanǵan sharalar avtomatty túrde tsıfrlyq tirkeýge alynýǵa qajet. Bul árbir sıgnal boıynsha kimniń, qashan jáne qandaı shara qabyldaǵanyn naqty kórýge múmkindik beredi, - dedi depýtat.

Aıta keteıik, elimizde balalarǵa qatysty zorlyq-zombylyq, qatygezdik pen jábirleý derekterine der kezinde áreket etýdiń biryńǵaı vedomstvoaralyq algorıtmi bekitildi.