Aızat Jumanovanyń ólimine qatysty sot: prokýror aıyptaý aktisin jarııalady

ASTANA. KAZINFORM – Taldyqorǵanda Aızat Jumanovanyń ólimine qatysty qylmystyq is boıynsha aldyn ala sot tyńdalymy ótti. Alǵashqy otyrysta prokýror Nurlan Bılibekov aıyptaý aktisin jarııalap, sotqa tergeý materıaldaryn usyndy, dep habarlaıdy agenttik tilshisi.

Tergeý nusqasyna sáıkes, erli-zaıyptylar arasyndaǵy janjal qaıǵyly oqıǵaǵa deıin shamamen eki apta buryn bastalǵan. Sol kezde Aızat Jumanova men Aıbar Janbolat arasynda daý shyǵyp, áıel emotsııaǵa berilip, óziniń telefonyn syndyrǵan. Osy oqıǵadan keıin olar bir-birimen sóılespeı júrgen.

Qaıǵyly oqıǵa bolatyn kúni Aıbar Janbolat alkogoldik mas kúıinde úıge oralyp, jubaıynyń bireýmen telefon arqyly sóılesip otyrǵanyn kórgen. Prokýrordyń aıtýynsha, osy jaǵdaıdan keıin er adamda qyzǵanyshtyń negizinde áıelin óltirý nıeti qalyptasqan.

Tergeý dereginshe, túngi saǵat 00:00 shamasynda Aıbar Janbolat Aızat Jumanovany Jetisý oblysy Balasaz aýylyndaǵy úıdiń qaqpasynan syrtqa shyǵaryp, áıeldiń denesiniń ártúrli bóligine qolymen jáne aıaǵymen birneshe ret soqqy jasaǵan. Jábirlenýshi toqtatýdy suraǵanyna qaramastan, aıyptalýshy ómirge mańyzdy organdarǵa soqqy berýdi jalǵastyrǵan. Áıel esinen tanyp qalǵan, alaıda soqqy berý áreketi toqtamaǵany aıtylady.

Aýyr jaraqat alǵan Aızat Jumanovany kúıeýi Taldyqorǵandaǵy oblystyq aýrýhanaǵa jetkizgen. Alaıda ol reanımatsııa bóliminde kóz jumdy.

Aıbar Janbolatqa Qylmystyq kodekstiń 99-babynyń 1-bóligi boıynsha «Kisi óltirý» baby taǵylyp otyr. Qylmystyq is Jetisý oblysynyń qylmystyq ister jónindegi mamandandyrylǵan aýdanaralyq sotynda qaralýda.

Buǵan deıin Taldyqorǵanda Aızat Jumanovanyń ólimine qatysty sot otyrysy bastalǵany habarlandy.