Aızat Jumanovanyń ólimine qatysty is boıynsha úkim qashan shyǵady
ASTANA. KAZINFORM – Sot protsesi kezinde aıyptaýshy jaq tergeý barysynda ketken birqatar qaıshylyqtar bar ekenin alǵa tartty.
Prokýror qaıǵyly oqıǵa bolǵan kúni tergeý áreketterine qatysqan qosymsha kýáger – tergeýshi Dáýlet Káripjanovtan jaýap alýdy surady.
Sot barysynda oqıǵa bolǵan jerdi qaraý hattamasynda jatyn bólmeden qyzyl tústi Samsung markaly uıaly telefon tárkilengeni kórsetilgen. Alaıda Daýlet Káripjanovtyń aıtýynsha, is júzinde oqıǵa ornynda uıaly telefon bolmaǵan.
– Maǵan qońyraý shalyp, Taldyqorǵanda Jumanovanyń máıiti tabylǵan jerge jetkenin, sol jerde telefondy alǵanyn aıtty. Biraq kim habarlasqanyn naqty esimde saqtaı almadym. Bul aqparat mańyzdy dep eseptep, hattamaǵa engizdim, – dedi ol sotta.
Jábirlenýshi tarap ókilderi Aızattyń ólimine qatysty iste áli de eskerilmegen jaıttardyń kóp ekenin málimdedi. Atap aıtqanda, bir telefonnyń ári aýrýhanadan, ári qylmys ornynan tabylýy túsiniksiz kúıinde qalyp otyr. Olardyń pikirinshe, mundaı olqylyqtar júrgizilgen tergeýdiń tolyqtyǵy men obektıvtiligine kúmán keltiredi.
Jábirlenýshi taraptyń advokaty Zarına Meırembaeva sottyń túpkilikti sheshimimen kelispegen jaǵdaıda, isti qaıta qaraýǵa qol jetkizetinin aıtty.
– Úkimmen kelispesek, apellıatsııalyq shaǵym beremiz, Joǵarǵy sotqa deıin baramyz. Qajet bolsa, halyqaralyq deńgeıge de shyǵamyz, – dedi ol.
Osyǵan baılanysty jábirlenýshi tarap barlyq anyqtalǵan derekterdi eskere otyryp, isti qaıta qaraýdy jáne sottalýshyǵa barynsha qatań jaza – ómir boıyna bas bostandyǵynan aıyrýdy taǵaıyndaýdy talap etip otyr.
Sottalýshy Aıbar Janbolat sońǵy sózinde bolǵan jaǵdaıǵa ókinish bildirip, Aızattyń ólimine qasaqana nıeti bolmaǵanyn aıtty. Ol marqumnyń týǵan-týystarynan, jaqyndarynan jáne óz ata-anasynan keshirim surady.
– Bolǵan jaǵdaıǵa qatty ókinemin jáne jazany kóterýge daıynmyn. Aızattyń týǵan-týystaryna shyn júrekten kóńil aıtamyn. Ortaq balamyzdyń jetim qalǵanyn túsinemin. Maǵan taǵylǵan qasaqana kisi óltirý baby boıynsha aıyppen kelispeımin, sebebi ony óltirý nıetim bolǵan joq. Men Aızatty jaqsy kórdim jáne áli de jaqsy kóremin. Qurmetti sot, ádil úkim shyǵarýyńyzdy suraımyn, – dedi sottalýshy.
Aızat Jumanovanyń ólimine qatysty is boıynsha úkim Aqsý aýdanynda 9 qańtar kúni saǵat 10:00-de jarııalanady.
Esterińizge sala keteıik, oqıǵa byltyr maýsym aıynyń 21-inen 22-sine qaraǵan túni Aqsý aýdanyna qarasty Balasaz aýylynda tirkelgen. Aızat Jumanova otbasyndaǵy janjal kezinde kúıeýiniń uryp-soǵýynan kóz jumǵan.
Buǵan deıin prokýror Aızat Jumanovanyń kúıeýin 15 jylǵa bas bostandyǵynan aıyrý jazasyn suraǵan bolatyn.