Aıyrtaý ekinshi Býrabaıǵa aınalady
ASTANA. QazAqparat - SQO ákimdigi Aıyrtaý aýdanynyń týrıstik áleýetin damytýǵa múddeli, dep habarlaıdy QazAqparat tilshisi. Bul týraly SQO ákimi Qumar Aqsaqalov Ortalyq kommýnıkatsııalar ortalyǵynda ótken baspasóz máslıhatynda málimdedi.
«Aıyrtaý - týrıstik áleýeti joǵary aýdan. Imantaý men Shalqar aımaqtary Býrabaıdan esh kem emes. Biraq onda baratyn jol salynbaǵan edi. Bıyl jol qurylysyna 500 mıllıon teńge bóldik jáne qazirgi ýaqytta 30 shaqyrym jol bóligin jóndep jatyrmyz. Kelesi jyly da qarjylandyrýdy arttyryp, týrısterdiń kóp kelýi úshin jaǵdaı jasaıtyn bolamyz», - dedi ol.
Óńir ákiminiń aıtýynsha, Aıyrtaýda demalys aımaǵyn salǵysy kelgen kásipkerlerge memleket qol ushyn sozady.
«Ázirge birqatar jobalar júzege asyrylyp jatyr, biraq olar aýqymdy emes. Sondyqtan, týrıstik aımaq jobasyna qarjy quıa alatyn kásipkerlerdi izdeımiz. Al biz ınfraqurylym jaǵynan kómektesemiz. ıAǵnı, demalys aımaǵyn salǵysy kelgen kásipkerlerge memleket esebinen kommýnıkatsııa, jaryq, gaz jabdyqtary tegin tartylady. Ekologııalyq týrızmdi damytý úshin, demalys aımaǵynyń tazalyǵyn da óz jaýapkershiligimizge alamyz. Kelýshiler shatyr tigip, tabıǵat aıasynda emin-erkin dem alady», - dep óz sózin tolyqtyrdy ákim.
Resmı málimetke sáıkes, jyl basynan beri Aıyrtaýǵa 19 myń týrıst kelgen.
