Aıyrtaý aýdanynda er adam toǵanǵa batyp ketti - SQO
PETROPAVL. QazAqparat – Soltústik Qazaqstan oblysynda sýǵa shomylý maýsymy bastalǵaly 4 adam qaza tapty, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, bir adam balyq aýlap júrip sýǵa ketse, qalǵan úsheýi sýǵa shomylýǵa baryp, ajal qushqan. Oqys oqıǵalardyń barlyǵy arnaıy jaraqtandyrylmaǵan oryndarda bolǵan.
13 maýsym kúni Aıyrtaý aýdanynda 1994 jyly týǵan er adamnyń denesi sýdan shyǵaryldy. Ol bir kún buryn tústen keıin arnaıy jaraqtandyrylmaǵan sý qoımasyna baryp túsken. Qutqarýshylar shomylyp júrip batyp ketken jigittiń denesin tek kelesi kúni tańerteń ǵana tapty.
«Oqys oqıǵa Tómengi Burlyq eldi mekeninen 3 shaqyrymdaı jerde ornalasqan qoldan jasalǵan toǵanda boldy. Úsh adam demalyp, sýǵa shomylý úshin barǵan. Er adamnyń batyp ketkendigi jóninde habar bizge saǵat 16.00 shamasynda tústi. Jol alys, qutqarýshylar jetkenshe qarańǵy túsip ketti. Sol sebepti tek erteńine kún shyqqan soń izdeý jumystary bastaldy. Múrdeni tek saǵat 10.00 shamasynda ǵana sýdan alyp shyqty», - deıdi SQO TJD bastyǵynyń orynbasary Igor Jýkov.
SQO-da bıyl sýǵa shomylýǵa arnaıy jaraqtandyrylǵan 58 oryn daıyndaldy.
«Arnaıy oryndar óńirdegi 12 kól men Esil ózeninde ornalasqan. Qalǵan jerlerde sýǵa túsý qaýipti. Sondaı-aq balalardy eresektersiz jalǵyz sýǵa shomylýǵa jiberýge bolmaıdy. Spırttik ishimdik iship sýǵa shomylýǵa tyıym salynǵan. Іshimdiktiń saldarynan adamda ózine-ózi senýshilik artyp, kúshin esepteı almaı qalýy múmkin. Sýdaǵy arnaıy belgilerden asýǵa bolmaıtynyn da eske salamyz», - deıdi Igor Jýkov.
