Aıyrbastaý pýnktterine altyn quımalaryn satýǵa ruqsat beriledi
«Zań jobasynda banktik emes aıyrbastaý pýnktterine Ulttyq bank shyǵarǵan shaǵyn altyn quımalardy satyp alý jáne satý quqyǵy beriledi. Sondaı-aq «valıýtalyq operatsııalar» uǵymyna valıýtalyq qundylyqtardy senimgerlik basqarýǵa nemese brokerlik qyzmet kórsetý týraly shart negizinde berý, beırezıdent shyǵarǵan elektrondy aqshany rezıdentpen satyp alý jáne óteý engizildi. Sonymen qatar, baǵaly qaǵazdar naryǵynyń kásibı qatysýshylaryna ishki valıýta naryǵynda qolma-qol emes shetel valıýtasyn satyp alý jáne satý quqyǵy berildi. Kórsetilgen túzetýler jeke tulǵalardyń ınvestıtsııalyq múmkindikterin keńeıtýge baǵyttalady, ishki valıýta naryǵynda básekelestikti damytýǵa yqpal etedi», - dep toqtaldy QR Ulttyq bankiniń tóraǵasy Danııar Aqyshev.
Zań jobasy qabyldanǵan jaǵdaıda bıznes sýbektilerine óz qyzmetin jańa talaptarǵa sáıkes keltirý úshin ýaqyt qajet bolady. Zań jobasyn qoldanysqa 2019 jyldyń 1 shildesinde engiziledi.
«2020 jyldyń 16 jeltoqsanynda Qazaqstannyń Dúnıejúzilik saýda uıymyna kirýiniń ótpeli kezeńi aıaqtalady, ol kezde sheteldik qarjy uıymdarynyń fılıaldary ishki naryqqa kirýge ruqsat alady. Sondyqtan zań jobasynyń 1-baby 3-tarmaǵynyń 7 abzatsy úshin qoldanysqa engizý merzimi 2020 jylǵy 16 jeltoqsan bolyp belgilendi»,- dep naqtylady UB basshysy.
Budan buryn habarlanǵandaı, jalpy otyrys barysynda Ulttyq bank tóraǵasy Qazaqstandaǵy sheteldik uıym fılıaldarynyń esep aıyrysýlaryn teńgege aýystyrýdy usyndy.
«Qazirgi ýaqytta elimizde sheteldik uıymdardyń 4,5 myń fılıaly tirkelgen. Dúnıejúzilik saýda uıymyna tolyq kirgennen keıin, onyń sanynyń ulǵaıýy kútiledi. Sáıkesinshe, el ishinde shetel valıýtasyndaǵy tólemder kóbeıedi, bul ulttyq múddelerge sáıkes kelmeıdi. Osyǵan baılanysty sheteldik uıymdar fılıaldarynyń qazaqstandyq kompanııalarmen esep aıyrysýlaryn teńgege aýystyrý usynylady. Qyzmeti memlekettiń atynan jasalǵan kelisimder arqyly retteletin kompanııalarǵa ózgerister qoldanbaıdy. Olar beırezıdent mártebesinde qala beredi», - dedi UB basshysy.