Aıyrbastaý pýnkteriniń jumysy týraly másele áli talqylanýda– Ulttyq bank
NUR-SULTAN. QazAqparat – Ulttyq bank tóraǵasynyń orynbasary Oleg Smolıakov valıýta aıyrbastaý naryǵyndaǵy ózgerister týraly aıtty, dep habarlaıdy QazAqparat tilshisi.
«Birinshiden, terrorızmge qarsy turý men aqshanyń jylystaýy turǵysynan tutynýshynyń aqsha aıyrbastaý qyzmetin baǵalaý talabyn kóterý kerek. Ol úshin esep bolýy tıis. Sonymen birge, aqsha aıyrbastaý pýnkteriniń básekesi men resýrstaryn arttyrǵan jón. Bul jarǵylyq kapıtaldy kóbeıtýge múmkindik beredi», - dedi Ulttyq bank tóraǵasynyń orynbasary Úkimettegi baspasóz máslıhatynda.
Ol sonymen birge, aqsha aıyrbastaý pýnktiniń jarǵylyq kapıtaly 100 mln teńge bolýy kerektigi týraly talapqa qatysty pikir bildirdi.
«Bul másele buryn da kóterilgen. Osydan bir jyl buryn biz jarǵylyq kapıtalǵa talapty arttyrý bastamasyn aıtqan edik. Biraq, ol kezde naryq kishireıip, aqsha aıyrbastaý pýnkteriniń jartysy naryqtan ketip qalady degen boljamdar aıtylǵan. Shyntýaıtynda, 10 paıyzdyq qysqarý boldy. Bul suraqtardyń bárin jan-jaqty talqylaý kerek», - dedi Oleg Smolıakov.
Ulttyq bank tóraǵasynyń orynbasary keı jaǵdaıda qarajattyń jetispeýshiliginen aqsha aıyrbastaý pýnkteri baǵam boıynsha aqparatty bere almaıtynyn aıtady.
«Biz aqsha aıyrbastaý pýnkteri qarajatynyń bir bóligi bank shotynda jatý kerek deımiz. Osynyń arqasynda olar árdaıym sheteldik valıýtanyń usynystary men suranystaryn qanaǵattandyra alady. Qandaı da bir túıindi máseleler kóterilip jatqanymen, naqty bekitilgen joq», - dedi spıker.
Eske sala ketsek, buǵan deıin QR Ulttyq bankiniń resmı saıtynda «Qazaqstan Respýblıkasynda qolma-qol shetel valıýtasymen aıyrbastaý operatsııalaryn uıymdastyrý qaǵıdalaryn bekitý týraly» QR UB basqarmasynyń №49 qaýlysyna ózgerister men tolyqtyrýlar engizý týraly» qaýly jobasy jarııalanǵan edi.
Qaýly jobasyna sáıkes, aqsha aıyrbastaý beketteriniń jumys ýaqytyn qysqartý josparlanǵan.
