Aıyrbastaý pýnkteriniń rýbldi saýdalaýǵa shekteý engizile me – Pirmatov jaýaby

NUR-SULTAN. QazAqparat – QR Ulttyq bank tóraǵasy Ǵalymjan Pirmatov Májilis depýtattarynyń aıyrbastaý pýnkteriniń Reseı rýblin satyp alýyna jáne satýyna shekteýler engizýge qatysty usynysyna jaýap berdi, dep habarlaıdy QazAqparat tilshisi.

«Mundaı shekteýlerdi engizý valıýtalyq zańnama aıasynda «arnaıy valıýtalyq rejımdi» engizý arqyly múmkin bolady. Alaıda, mundaı shekteýler men mundaı rejım táýeliz rezervterdiń «sarqylýy», eldiń tólem balansynyń nasharlaýy, sondaı-aq qarjylyq turaqtylyq úshin eleýli táýekel bolǵan jaǵdaıda ǵana engizilýi tıis. Búgingi kúni tólem balansynyń aıtarlyqtaı nasharlaýynyń baıqalmaıtynyn eskere otyryp, Ulttyq bank óz mandaty aıasynda eldiń qarjy júıesiniń turaqtylyǵyn jáne rezervterdiń saqtalýyn qamtamasyz etedi. Demek, aıyrbastaý pýnkteriniń shetel valıýtasyn satyp alýyna jáne satýyna shekteý engizý orynsyz bolyp tabylady jáne qarastyrylmaıdy», - dedi Ulttyq bank tóraǵasy jaýabynda.

Buǵan qosa, onyń atap ótýinshe, mundaı is-sharalardy engizý ınvestıtsııalyq ahýalǵa aıtarlyqtaı zııanyn tıgizedi. Al bul jaıt eldiń ınvestıtsııalyq tartymdylyǵyna teris áser etýi múmkin.

«Rýbldiń nyǵaıýy RF ónimi ımportynyń tartymdylyǵyn tómendetedi jáne sonymen birge otandyq óndiristiń damýyn yntalandyrady. Nátıjesinde, Qazaqstannyń zańdy jáne jeke tulǵalary jańa jaǵdaılarǵa, onyń ishinde basqa óńirlerden ımporttyń balamaly kózderin izdeý esebinen beıimdeledi. Qazaqstan naryǵy jaǵdaılardyń ózgerýine baılanysty derbes beıimdelýge jáne suranysty, usynysty jáne jetkizý arnalaryn túzetýge tıis dep oılaımyz», - dedi Ǵalymjan Pirmatov.