Aıyrbas pýnktteri qyzmetin retteý ekonomıkany dollarsyzdandyrýdaǵy sharalardyń biri bolady - Ulttyq bank tóraǵasy
ASTANA. QazAqparat - El ekonomıkasyn dollarsyzdandyrýdaǵy naqty sharalardyń biri aıyrbas pýnktteriniń qyzmetin retteý bolady. Bul týraly «KTK» telearnasynyń «Halyq qyzmetshisi» baǵdarlamasynda qonaqta bolǵan QR Ulttyq bankiniń tóraǵasy Qaırat Kelimbetov málim etti.
«Meniń oıymsha, bizdiń ekonomıkamyzdy dollarsyzdandyrýǵa baǵyttalǵan sharalardyń biri aıyrbas pýnktteriniń qyzmetin retteý máselesi bolady. Men aıyrbas pýnktteriniń qojaıyndaryn qandaı da bir qatal sharalarmen qorqytqym kelmeıdi. Barynsha órkenıetti sharalar bar. Bul pýnktter qandaı da bir banktiń quramdas bóligi bola alady nemese basqa da retteý sharalary týraly kelisimge kele alamyz», - dedi ol.
Sonymen qatar, Ulttyq bank tóraǵasy búgingi tańda jekemenshik aıyrbas pýnktteri qaýipti turaqsyzdandyrǵysh elementi bolyp otyrǵandyǵyn da basa aıtty.
«Ulttyq bank bul máseleni birneshe márte kóterýge tyrysty. Barlyq ýaqytta da aıyrbas pýnktteri shaǵyn jáne orta bıznes retinde ári oǵan shekteý qoımaý kerektigi turǵysynda qaralyp keldi. Biz osymen úshinshi devalvatsııanyń nátıjesinde memlekettiń barlyq qarjy aǵyndaryn naqty retteýi kerektigine, al ol úshin sáıkesinshe aqparattyq bazanyń qajettigine kóz jetkizdik», - dedi Q.Kelimbetov.
