Aıyppuldyń qosarlanyp kelýi tehnıkalyq irkiliske baılanysty - polıtsııa
NUR-SULTAN. QazAqparat – Elordada keıbir júrgizýshilerge jol júrisi erejesin buzǵany úshin aıyppuldyń qosarlanyp kelý faktisi tirkelgen. Mundaı jaıttyń nelikten oryn alǵanyn Nur-Sultan qalalyq polıtsııa departamenti Ákimshilik polıtsııa basqarasynyń bastyǵy Eljan Shúpekov túsindirdi, dep habarlaıdy QazAqparat tilshisi.
«Kez kelgen tehnıkada mıllıonnan bir qatelik ketetindigi sózsiz. Biraq, ol óte sırek oryn alatyn jaǵdaı. Bul - taza tehnıkalyq qatelik. Mundaı jaǵdaıda azamattar bizge júginýi qajet. Biz tekseris júrgizetin bolamyz. ıAǵnı, bizde adamı faktor múldem joq. Munyń barlyǵy da tehnıkalyq sebepterge baılanysty bolady», - dep túsindirdi Eljan Shúpekov QazAqparat tilshisiniń saýalyna oraı.
Aıta keteıik, taıaýda áleýmettik jeli qoldanýshylarynyń biri kólik jyldamdyǵyn ruqsat etilgen shekten asyryp jibergeni úshin 2 aıyppuldyń arasy 2-3 mınýttyq ıntervalmen kelgenin jazǵan bolatyn.
«Jyldamdyqty asyrǵanym úshin eki aıyppul jiberipti. Birinshisiniń ýaqyty - 2021 jyldyń 28 jeltoqsany kúni saǵat 10:17, al ekinshisi – dál sol kúni saǵat 10:20. Birinshi aıypul somasy – 7 293 teńge, ekinshisi 15 315 teńge. Bir ýaqytta 3 mınýttyq aıyrmashylyqpen ǵana. Aıyppuldy tóledim. Biraq, munyń qanshalyqty zańdy ekenin bilgim keledi. Menińshe, bir ereje buzýshylyqqa eki tólem jasaǵan sııaqtymyn. Óıtkeni, birinshi jyldamdyq asyrǵanymdy týra baǵyttaǵy «Sergek» kamerasy, ekinshisin 3 mınýttan keıin qarsy baǵyttaǵy kamera túsirgen. Demek, týra baǵyttaǵy kamera kóliktiń artynan túsirýi kerek edi. Al maǵan kelgen uıǵarymnyń ekeýinde de kólik aldynan túsirilgen», - dep jazdy Gúlnur Ábisheva Facebook paraqshasynda.
