Aıyppuldy 50% jeńildikpen tóleý qashan alynyp tastalady

NUR-SULTAN. QazAqparat – Onlaın brıfıng barysynda ІІM Ákimshilik polıtsııa komıteti tóraǵasynyń orynbasary Jandos Muratálıev aıyppuldy 50 paıyz jeńildikpen tóleý quqyǵynan qandaı sanattaǵy júrgizýshiler aıyrylatynyn aıtty, dep habarlaıdy QazAqparat tilshisi.

«Júrgizýshiler jol erejesin buzady. Jol apatyn jasaıdy. Biraq sonda da jol erejesin buzýdy toqtatpaıdy. Biz oılaımyz, bul júrgizýshiler qazirgi aıyppuldardy elemeıdi. Odan nátıje bolmaıdy. 50 paıyz jeńildikpen tóleý quqyǵynan tek óreskel ári jol apatyna ákelip soǵatyn quqyq buzýshylyq jasaǵandar ǵana aıyrylady», - dedi Ákimshilik polıtsııa komıteti tóraǵasynyń orynbasary.

Jandos Muratálıev mundaı bastama jol apatynyń aldyn alý, ony azaıtý maqsatynda qolǵa alynyp otyrǵanyn jetkizdi. Sonymen qatar ol 50 paıyz jeńildikti alyp tastaý týraly ózgerister qaı ýaqytta engiziletinin aıtty.

«Keıbir júrgizýshilerdiń aıyppuldy 50 paıyz jeńildikpen tóleýin alyp tastaý jobasy áli resmı túrde engizilgen joq. Jylyna 3 mln-nan astam jol júrý erejesin buzǵandar anyqtalatyn bolsa, sonyń tek 5 paıyzy 5-ten kóp jol erejesin buzǵandar. Sol 5 paıyzdyń ózi jol apatyna jıi túsýi múmkin. Bul usynystar mindetti túrde qoǵammen jáne ózge de memlekettik organdarmen talqylanady. Solardyń barlyǵyn jınap, shamamen qyrkúıek aıynda atalǵan ózgeristerdi engizemiz dep oılap otyrymyz», - dep túsinikteme berdi Jandos Muratálıev.

Eske sala keteıik, keshe 5-ten kóp jol erejesin buzǵan júrgizýshi aıyppuldy 50% jeńildikpen tóleý quqyǵynan aıyrylatynyn habardap edik.