Aıyppul týraly jyldam ári jeńil bilýge bolady
ASTANA. QazAqparat - Tólenbegen ákimshilik aıyppuldar týraly QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń saıtyndaǵy (https://service.pravstat.kz) «Aqparattyq servıs» bóliminde «Aıyppuldar týraly málimetter» terezesinen jeńil ári jyldam bilýge jáne ony tóleýge bolady.
«Olardy jedel ári yńǵaıly tóleý úshin qosymsha jaǵdaı týdyrý maqsatynda Bas prokýratýra ýákiletti memlekettik organdardyń yqpaldastyrylǵan júıesin, sonymen qatar «elektrondyq úkimet» tólem shlıýzin jáne ekinshi deńgeıdegi bankterdiń «e-aıyppuldardy» qurý máselesin belsendi pysyqtaýda.
Osy maqsattarda Bas prokýratýra Komıtetiniń ortalyqtandyrylǵan ákimshilik qoryna árbir aıyppul boıynsha tólem derektemeleri engiziledi, ol boıynsha naqty aıyppuldy taýyp, onyń tólený faktisin kýálandyrýǵa bolady. Aıyppul Komıtet júıesine engizilisimen elektrondyq úkimetti paıdalanýshynyń jeke kabınetine jáne onyń elektrondyq poshtasyna kelip túsedi. Bul jerde, sondaı-aq aıyppuldy elektrondy túrde tóleýge múmkindik bar»,-delingen Komıtet habarlamasynda.
Atap aıtqanda, QR Investıtsııalar jáne damý mınıstrligimen birlesip Bas prokýratýra Komıteti men «elektrondyq úkimet» portaly arasynda aıyppuldar týraly derektermen almasý servısteri quryldy. Osynyń arqasynda, kez-kelgen azamat qolynda túbirtegi bolmasa da bankten naqty quqyq buzýshylyq boıynsha aıyppuldy naqtylap, tóleýge múmkindik alady.
«Qazirgi ýaqytta mundaı múmkindikke Qazaqstannyń Eksımbanki kassalaryna júgingen kezde ıe bola alasyz. 2016 jyldyń barysynda ekinshi deńgeıdegi bankterdiń «e-Aıyppuldar» júıesine qosylǵandardyń sany eleýli artatyn bolady. Sonymen qatar, Qazaqstan Respýblıkasy Ákimshilik quqyq buzýshylyqtar týraly kodeksiniń 893-baby 2-bóligine sáıkes, aıyppul tólegennen keıin jazbasha túrde sýdıaǵa nemese aıyppul salǵan organǵa (laýazymdy tulǵaǵa) habarlaý, atap aıtqanda tólengeni týraly túbirtekti usyný qajet. Óıtpegen jaǵdaıda, aıyppul oryndalmaǵan retinde sanalatyn bolady»,-delingen vedomstvo málimetinde.
