Aıyppul týraly habarlama alaıaqtyqtyń jańa túri me – SQO polıtseıleri túsindirdi

PETROPAVL. QazAqparat – Soltústik Qazaqstan oblysynyń polıtseıleri áleýmettik jelide alaıaqtyqtyń jańa túri dep taralyp jatqan habarlamaǵa qatysty túsinikteme berdi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, sońǵy kúnderi petropavldyqtar ınternet-alaıaqtyqtyń jańa túri dep aıyppuldyń kelgeni týraly habarlamanyń skrınshotyn WhatsApp messendjeri arqyly taratyp jatyr. Habarlamanyń basynda jiberýshi «Police_Pvl» dep kórsetilgen. Departamenttiń krımınaldyq polıtsııa qyzmetkerleri osy habarlamaǵa qatysty túsinikteme berdi.

«Mundaı resmı mekenjaı joq. Sondyqtan, saq bolý kerek. Aıyppuldyń bolýy nemese bolmaýy týraly resmı arnalar arqyly bilýge bolady, ıaǵnı QR elektrondyq úkimetiniń 1414 biryńǵaı baılanys ortalyǵyna qońyraý shalý nemese polıtsııaǵa habarlasý qajet. Eshqashan kúmándi kórinetin siltemelerdi basyp kirmeý kerek: qurylǵyǵa qaýipti vırýs engizý qaýpi bar, bul qaskóılerge sizdiń qupııa aqparatyńyzǵa jáne banktik shottaryńyzǵa qol jetkizýge múmkindik beredi», - deıdi SQO PD Krımınaldyq polıtsııa basqarmasynyń asa mańyzdy ister jónindegi aǵa jedel ýákili Vıtalıı Podchernın.

Bul jaıtqa baılanysty SQO polıtsııasynda aryz tirkelmegen. Alaıda, krımınaldyq polıtsııa qyzmetkerleri 1414 biryńǵaı baılanys ortalyǵyna qazaqstandyqtardyń kúmándi habarlama kelýine baılanysty júgingenin rastap otyr.

Tártip saqshylary messendjerler jáne áleýmettik jeliler arqyly keletin ártúrli «aktsııalarǵa», «utys oıyndaryna» jáne basqa da «qyzyqty» usynystarǵa kúmánmen qaraýǵa keńes beredi. Internet nemese basqa joldarmen keletin kez kelgen aqparatty resmı resýrstardan tekserý qajettigin eske salady.