Aıvazovskııdiń kartınasyn qoldy qylǵan ury óz erkimen polıtsııaǵa berilgen
ASTANA. QazAqparat - Bishkek qalasynyń polıtsııasyna er adam kelip, Ivan Aıvazovskııdiń «Qyrymdaǵy teńiz peızajy» kartınasyn urlaǵanyn moıyndady. 30 jastaǵy tas qalaýshy bul qylmysqa áıgili sýretshiniń qylqalamynan týǵan shyǵarmanyń qundy ekenin bilgen soń, qasaqana barǵan.
Rafael esimdi azamat murajaıǵa kelip, ekinshi qabatqa kóterilgen. Zalda baqylaýshy bolmaǵan soń, kózine birinshi túsken kartınany alyp, qashyp ketken. Urlyq jasalǵan kezde murajaıdyń qyzmetkerleri jańajyldyq keshte bolǵan.
Urlanǵan kartına qoǵamdyq pikir týdyrǵan soń, oıǵa qalǵan ury ony qaıtarmaqqa bel býǵan. Alaıda murajaıdyń aldyndaǵy tártip saqshylaryn kórip, seskenip qalǵan ol qundy týyndyny jýrnalısterge bergen. Daý-damaı budan keıin de tyıylmaǵan soń ol quqyq qorǵaý organdaryna óz erkimen berilýge sheshim qabyldapty.
Aıvazovskııdiń 1866 jyly salynǵan bul kartınasynyń quny - 40 myń dollar.
