Aıýsaı shatqalyndaǵy «Myń kóz» soqpaǵyna salynǵan petroglıfter búlindi
ALMATY. QazAqparat - Aıýsaı shatqalyndaǵy «Myń kóz» soqpaǵyna salynǵan petroglıfterdi vandaldar búldirip ketti. Bul týraly «Aıýsaı» vızıt - ortalyǵynyń baspasóz qyzmeti Instagram paraqshasynda jazdy, dep habarlaıdy QazAqparat tilshisi.
«Bizdiń Aıýsaı shatqalyndaǵy «Myń kóz» soqpaǵyna belgili sýretshi Sanjar Jubanov salǵan janýarlardyń petroglıfteri sán berip tur. Bul tas gravıýralar soqpaq joldyń boıynda ornalasqan jáne onda qar barysy, Tıan-Shan qońyr aıýy, sileýsin jáne t.b. sırek kezdesetin janýarlardyń sýretteri bar. Qazir olar «Myń kóz» soqpaǵynyń ǵana emes, sonymen birge bizdiń ortalyqtyń, búkil Aıýsaı shatqalynyń qundylyǵy bolyp tabylady», - delinedi habarlamada.
Ókinishke qaraı, jaqynda «Myń kóz» soqpaǵyndaǵy petroglıfterdi vandaldar búldirip ketken. Osylaısha sýretshiniń bes aıǵa jýyq tókken mańdaı teri men kúsh-jigerin jumsaǵan týyndylary bir sátte joıylǵan.
«Biz Sanjar Jubanovpen búlingen petroglıfterdi qalpyna keltirý týraly ýaǵdalastyq. Sondaı-aq, biz barlyq týrıster men shatqalǵa jáne Іle-Alataý ulttyq parkine kelýshilerdi osy jerge qurmet kórsetýge shaqyramyz», - dep habarlady «Aıýsaı» vızıt-ortalyǵy jelide.
Sondaı-aq vızıt-ortalyqtyń baspasóz qyzmeti azamattardy vandalızm is-áreketterine kýá bolǵan jaǵdaıda, qajetti sharalar qabyldaý úshin «Aıýsaı» vızıt-ortalyǵynyń ákimshiligine dereý habarlasýdy surady.
