Aıýsaı shatqalyndaǵy aǵashtardyń kesilý sebebi anyqtaldy
ALMATY. QazAqparat – Almaty qalalyq jasyl ekonomıka basqarmasy Aıýsaı shatqalyndaǵy aǵashtardyń kesilýine qatysty túsinikteme berdi, dep habarlaıdy QazAqparat tilshisi.
Jasyl ekonomıka basqarmasynyń málimetishe, «Qazseldenqorǵaý» memlekettik mekemesi Aıýsaı saǵasynan tómen Úlken Almaty ózeninde selden qorǵaıtyn bóget salyp jatyr. Osyǵan baılanysty jasyl jelekti otaǵan. Alaıda,basqarma aǵashtardy kesýge ruqsat bermegen.
«Áleýmettik jelilerde paıda bolǵan 5000 aǵash kesildi degen aqparat shyndyqqa janaspaıdy. Basqarma qyzmetkerleri Botanıkalyq baqtyń dendrologtarymen birge birneshe ret kesilgen aǵashtardyń sanyn jáne túrin anyqtaý úshin ýchaskege bardy. Mamandardyń aıtýynsha, qysqy ýaqytta kesilgen aǵashtar men butalardyń sanyn eseptep shyǵarý qıyn boldy», - dep habarlady basqarmadaǵylar.
Aralyq zertteý nátıjeleri boıynsha, 32 myń sharshy metrdi quraıtyn aýmaqta aǵashtar zańsyz kesilgeni anyqtaldy.
Botanıkalyq baq usynǵan málimeterge sáıkes, Aıýsaı shatqalynda raýshan gúli, shyrǵanaq, bóriqaraqat, qaıyń, terek, dolana, alma, aq tal kesilgen.
«Jasyl jelekterdi kútip-ustaý men qorǵaýdyń standartty erejelerin buzǵany úshin jaýaptylar jıyrma eselik kólemde ótemaqy otyrǵyzýy kerek. ıAǵnı, 23780 jasyl jelek otyrǵyzylýy tıis. Aıta ketý kerek, Úlken Almaty ózeni basseınine, Aıýsaı shatqalyna jáne Aqsaı ózeniniń basseınine selden qorǵaıtyn bógetter qajet. Bul óte mańyzdy. Óıtkeni 300-ge jýyq áleýmettik jáne óndiristik nysandar, sondaı-aq 30 myń adam turatyn turǵyn úıge qaýip bar. Aqsaı ózeniniń basseıninde selden qorǵaıtyn bóget joq «, - dep atap ótti jasyl ekonomıka basqarmasy.
Almaty qalalyq Tótenshe jaǵdaılar departamentiniń aqparattaryna sáıkes, bóget eldi mekenderdi selden qorǵaıdy.
Jasyl ekonomıka basqarmasy, tergeý jumystary jalǵasatynyn jáne aıaqtalǵannan keıin nátıjeler týraly tolyq aqparat beretinderin jetkizdi.
