Aıýsaı shatqalynda tastar qulap, sarqyramalarǵa aparatyn joldy basyp qaldy

ALMATY. QazAqparat – Aıýsaı shatqalynda sarqyramalarǵa aparatyn joldy tastar basyp qaldy, dep habarlaıdy QazAqparat tilshisi.

Jolǵa qaraı qulaǵan tastar tosqaýyl tory men eskertý taqtalaryn buzyp ketken.

«Osyǵan baılanysty Almaty qalasynyń tótenshe jaǵdaılar departamenti birinshi, ekinshi jáne úshinshi sarqyramalarǵa barýǵa tyıym saldy. Sondyqtan, Aıýsaı sarqyramalaryna ekskýrsııalardy toqtatýǵa májbúrmiz. Aıýsaı shatqalyna keletin qonaqtardy táýekelge barmaýǵa jáne serýendeý úshin qaýipsiz marshrýttardy, mysaly Myń kóz jolyn tańdaýǵa shaqyramyz», - dep jazylǵan Aıýsaı vızıt ortalyǵynyń áleýmettik jelidegi paraqshasynda.

Sondaı-aq, vızıt ortalyǵy shatqalǵa barý joldary ábden qaýipsiz bolǵan kezde, ol týraly mindetti túrde habarlanatynyn málimdedi.