Aıýmen aıqasqan Kamchatka turǵyny aman qaldy
ASTANA. QazAqparat - Kamchatka ólkesinde Razdolnyı kentiniń turǵyny ormanda kirekeımen (urǵashy aıý) aıqastan keıin aman qaldy. Er adam ortasha dárejeli jaraqattarmen aýrýhanada jatyr.
Bul týraly búgin TASS-qa Reseı ІІM Kamchatka ólkesi boıynsha basqarmasynyń ókili Alla Ivanovna habarlady.
«Oqıǵa 17 tamyzda jergilikti ýaqyt boıynsha saǵat 21:00-de Elızov aýdany Razdolnyı kentinen 7 shaqyrym jerde oryn aldy. 42 jastaǵy er adam ıtimen birge ormanǵa sańyraýqulaq terýge shyqqan. Alańqaıdyń birinen aldymen eki qonjyq, artynsha kirekeı shyǵa kelgen», dep málim etti basqarma ókili.
Er adam aǵashqa órmelep shyǵýǵa tyrysqan, alaıda aıý ony aıaǵynan tistep, tómenge tartyp túsirgen. Ekeýiniń arasynda aıqas bastalǵanda, ıti jyrtqyshty qýýǵa tyrysqan. Aqyr sońynda aıý qashyp ketken.
