Aıýandyqpen óltirilgen ápkeli-sińlilerdiń denesin qalaı taýyp alǵanyn kórshileri aıtyp berdi
ALMATY. QazAqparat - Almatyda qanisherdiń qolynan qaza tapqan ápkeli-sińlililerdiń denesin qalaı tabylǵanyn kórshisi aıtyp berdi, dep habarlaıdy QazAqparat tilshisi.
Qaıǵyly oqıǵa jeltoqsannyń 1-2 qaraǵan túni Jetisý aýdanynda bolǵan.
«Baraholka» bazary mańynda turatyn ápkeli-sińlililer 48 jastaǵy Tımoveeva Lıýdmıla men 27 jastaǵy Olga Sýslınany 1-2 qaraǵan túni pyshaqtap ketken. Kórshileriniń aıtýynsha, qylmysker áıelderdi qınap óltirgen.
Qanisherdiń qolynan jaralanǵan taǵy bir er adam qazir aýyr halde jansaqtaý bóliminde jatyr. Áıelderge kómekke kelgen er adamdy qylmysker basynan uryp taldyrǵan.
Odan keıin qylmysker izin jasyrý maqsatynda úıdi órtep jibergen. Kıimi qan-qan qylmyskerdiń ary-beri júrgeni aýladaǵy beınekameraǵa túsip qalǵan. Polıtsııa 34 jastaǵy kúdiktiniń izdestirip jatyr.
Eki úıden keıin turatyn Baqyt Qurmanseıitova «jantúrshigerlik oqıǵadan soń úıimizden attap shyǵýǵa qorqyp qaldyq» dep otyr.
Onyń aıtýynsha, dál sol kúni kóshede jym-jyrt tynyshtyq bolǵan.
«Eshkim eshteńe estimegen. Kórshilerdiń biri dalaǵa shyqqan ýaqytta órtti baıqap, bárimizdi oıatty. Órtti óshirip jatqan kezde, dálizde bir er adamdy kórdik. Ol Lıýdanyń kórshisi Serik bolyp shyqty. Onyń esi kiresili-shyǵasyly bop jatqanda alyp shyqtyq. Arǵy bólmeden kelinshekterdiń aıaǵyn baıqadyq. Qarasaq marqumdardyń denesinde saý jer joq. Olıany 16 jerden pyshaqtaǵan», - dedi Baqyt Qurmanseıitova.
Kórshisiniń aıtýynsha, Lıýdmıla túngi 1:30 shamasynda kórshisi Serikke qońyraý shalyp, kómek suraǵan. Serik kelgen bette qanisher ony basynan uryp taldyrǵan. Esi kiresili-shyǵasyly kúıdegi Serik eki ret dalaǵa qashqan. Eki ret qylmysker ony úıge súırep kirgizgen. Munyń bári vıdeoǵa túsip qalǵan.
48 jastaǵy úlken ápkesi Lıýdmıla Tımofeeva bankte kúzetshi, al 27 jastaǵy sińlisi Olga Sýslına kógaldandyrý bóliminde istegen eken.
Olganyń qurbylarynyń aıtýynsha, Zamaddın Paltýev Olgany zırat janynda ustap alyp zorlamaq bolǵan. Ómiri úshin qoryqqan Olga qanisherdi úıine alyp kelgen. Sodan ol kelinshektiń qaıda turatynyn bilip alyp, 1-jeltoqsan kúni izdep kelgen.
Baqyt Qurmanseıitova kúdikti retinde izdestirilip jatqan Zamaddın Paltýevti syrttaı tanıdy eken. Buryn bul adam qyz zorlaǵany úshin túrmege otyryp shyqqan.
«Dál sol túni ol kóshede júrgen eken. Birneshe kórshilerimizdiń esigin qaqqan. Jylynyp alsam bola ma dep. Shynymyzdy aıtsaq biz qazir syrtqa shyǵýǵa qorqamyz. Janymyzdaǵy zıratta neshetúrli adamdar turady. Ol jerden ótý múmkin emes. Qyzymdy ákesi kúndiz de aıaldamaǵa deıin shyǵaryp salady», - dedi ol.
Qazir qalalyq polıtsııa 34 jastaǵy Zamandın Paltýevke izdeý jarııalady. Ázirge qalalyq ІІD tolyq túsinikteme bergen joq.
