Aıtjanov: Prezıdent Kýbogynda kim úzdik shyqsa, sol Azııa chempıonatyna barady
ASTANA. QazAqparat - Búgin Astanada bastalǵan bokstan QR Prezıdenti Kýbogynda úzdik óner kórsetken ulttyq quramanyń boksshylary Azııa Chempıonatynda el namysyn qorǵaıtyn bolady. Bul týraly búgin «Dáýlet» sport kesheninde ótken baspasóz máslıhatynda Qazaqstan ulttyq quramasynyń bas bapkeri Myrzaǵalı Aıtjanov málim etti, dep habarlaıdy QazAqparat tilshisi.
QR Prezıdenti Kýbogynyń bastalýyna oraı ótkizilgen baspasóz máslıhatynda bas bapker «Osy týrnırden jeńimpaz atanǵan boksshylar Azııa Chempıonatyna iriktele me?» degen suraqqa jaýap berdi.
«Ulttyq quramanyń 36 boksshysy osy týrnırge qatysyp jatyr. Árıne, bul jerde keıbir salmaqtarda irikteý bolady. Birinshi kezekte, aıta ketetin jaıdaı - 10 salmaqtyń 7 salmaqtaǵy boksshylary ǵana Azııa oıyndarynda óner kórsetedi. Uıymdastyrý komıteti úsh salmaqty qysqartty. Sol sebepten, jeti salmaqta qatysamyz. Al sol jeti salmaqta irikteýler bolady. Qaı salmaq ekenin qaraımyz. Nege deseńizder, keıbir salmaqtarda básekelestik óte kúshti», - deıdi ol.
Myrzaǵalı Aıtjanovtyń aıtýynsha, ulttyq quramadan maqtaýly sportshylardyń barlyǵy QR Prezıdenti Kýbogyna qatysyp jatyr.
«Bizdiń elden bólek, Azııa eliniń myqty boksshylary sharshy alańǵa shyǵady. Amerıkadan, Eýropa elderinen sportshylar keldi. Biraq, bizge bul týrnırdiń eń jaqsysy - Azııadaǵy eń myqty degen, Ózbekstan, Japonııa, Mońǵolııa, Qytaı sekildi elderden myqty boksshylar keldi. Sol sebepten kim (ulttyq quramadan - avt.) osy jerde jaqsy óner kórsetedi, solar Azııa oıyndaryna barady», - dedi ol.
Eske sala ketsek, búgin Astanadaǵy «Dáýlet» sport kesheninde Qazaqstan Respýblıkasy Prezıdentiniń Kýbogi úshin bokstan VI Halyqaralyq týrnır bastalady. Boks boıynsha QR Prezıdentiniń Kýbogyna 15 eldiń ókilderi, atap aıtqanda Belarýs, Úndistan, Reseı, Japonııa, Qyrǵyzstan, Mońǵolııa, Qytaı, Fılıppın, Shvetsııa, Tájikstan, Taıland, Túrikmenstan, AQSh, Ózbekstan jáne Qazaqstannyń 180-ge jýyq sportshysy qatysady. Olardyń 140-y er, 40-y áıel sportshylar.
https://kaz.inform.kz/news/kr-prezidenti-kubogynda-15-eldin-boksshylary-ozara-myktyny-anyktaydy_a3277349
