Aıtyskerler Jańa jyl merekesinde karantın talaptaryn saqtaýǵa shaqyrdy

- Ótip bara jatqan jyl qazaq halqy úshin ońaı bolǵan joq. Qanshama asyl azamattarymyzdan aıyrdy. Osyndaı oqıǵalardyń áli el esinde ekeni aqıqat. Sondyqtan qurmetti qazaqstandyqtar, Jańa jyldy atap ótken kezde tártipke ıkemdelýge shaqyramyn. Tártip bar jerde bolashaǵymyzdyń jaqsy bolatyny anyq. Úlken korporatıvtik keshter, kópshilik bas qosatyn jıyndardan bas tarta turǵanymyz jón. Óıtkeni kún saıyn etek alyp bara jatqan indet bizdiń kósile, esile júrgenimizge qaramaıdy.

Keler jyl aýyrtpashylyqtan arylyp, úlken qýanyshqa bólenetin jyl bolsyn! Barsha Qazaqstan halqyn kele jatqan Jańa jyl merekesimen quttyqtaımyn! Jańa jyl jarylqap, eski jyl esirkesin.

Serikzat Dúısenǵazın, aıtysker aqyn, fılologııa ǵylymdarynyń kandıdaty:

- Jańa jyl - otbasylyq mereke. Biraq bizde dostar, týystar jáne áriptester bolyp korporatıv uıymdastyrý ádetke aınalǵan. Búgingi jaǵdaıda osyndaı sharalar jasaý birinshiden, ózimizge ekinshiden, jaqyndarymyzdyń densaýlyǵy úshin qaýipti. Meıramdy jabyq ǵımarattardyń ishinde toılaý arqyly jaǵdaıdy ýshyqtyryp alýymyz ǵajap emes. Adam - vırýs tasýshy. Infektsııa kez-kelgen azamattyń boıynda bolýy múmkin. Tek keıbir adamdarda ol sımptomsyz ótip jatady. Eger beıqamdyqqa salynatyn bolsaq, jaz mezgilindegi qıyn jaǵdaı qaıtalanyp ketýi múmkin. Sondyqtan barsha azamattardy karantın talaptaryn saqtaýǵa shaqyramyn. Múmkindik bolsa, taza aýda serýendep, sportpen aınalysqan durys dep oılaımyn.

2020 jyldyń basynda álemdi pandemııa jaılady. Barlyǵymyz onlaın jumys isteýge ıkemdeldik. Bul protsesterdiń barlyǵy kimge bolsa da ońaı tıgen joq. Sondyqtan indetten qutylyp, buryńǵy mamyrajaı ómirge oralatyn kúnge jazsyn. El-jurtymyz aman, bereke-birligimiz bekem bolsyn!

Dıdar Qamıev, aıtysker aqyn, QR Eńbek sińirgen qaıratkeri:

- Barlyǵymyz Jańa jyldy atap ótkimiz keledi. Degenmen saqtyq sharalaryn esten shyǵarmaýymyz kerek. Jańa jyl - kóp kúnániń jasalatyn túni. Sondyqtan karantın talaptaryn negizge alsaq, bir jaǵynan kúná jasaýdan da saqtanasyz. Jańa jylǵa denimizdiń saý bolyp barǵany durys shyǵar. Toılaıtyn bolsańyzdar, tek otbasylyq deńgeıde bas qosyp, úı aralamaı atap ótýge shaqyramyn.

Jańa jylda barshańyzǵa jaqsylyq tileımin. Karantınniń aıasy tarylyp, buryńǵy jaıma shýaq kúnimizge qaıta oralaıyq.

Jandarbek Bulǵaqov, aıtysker aqyn:

- Іndet tek qazaq halqyn ǵana emes, búkil álemdi alańdatyp otyr. Sondyqtan jaqyndarymyzdyń densaýlyǵyna janashyrlyqpen qarap, Jańa jyl merekesin otbasy deńgeıinde atap ótýge shaqyramyn. Infektsııanyń saldarynan ǵylym, bilim, óner, sport salasyndaǵy múıizi qaraǵaıdaı azamattarymyzdan kóz jazyp qaldyq. Bıylǵy jyl janymyzdaǵy jaqyn adamdarymyzdyń qadirin túsindiretindeı sabaq berdi dep oılaımyn. Múmkindigimizshe aq halatty abzal jandardyń shyryldap aıtyp jatqan keńesine qulaq asaıyq. Aty jaman aýrýdyń beti qaıtsa, máre-sáre qaýyshatyn kún alda dep oılaımyn.

Muhtar Nııazov, aıtysker aqyn, Qyzylorda qalalyq mádenıet jáne tilderdi damytý bóliminiń basshysy:

- Jańa jyl – qazaq halqyna úsh qaınasa sorpasy qosylmaıtyn mereke. Óıtkeni bul meıram qarsańynda jas shyrshalarǵa zııan keltirip, olardy otaımyz. Sondaı-aq pırotehnıkalardy qoldanyp, ot-shashý uıymdastyrý saldarynan qanshama jastar zardap shegip jatady. Statıstıka boıynsha, Jańa jyl merekesinde jaraqat alyp, aýrýhanaǵa túsetin naýqastardyń sany kóp bolady. Eger atalǵan merekeni toılaımyn degen azamattar bolsa, onda ony otbasy kóleminde atap ótse durys dep oılaımyn. Bıyl qonaqqa baryp, alaýlatyp, jalaýlatyp toı toılaıtyn jaǵdaı joq. Sondyqtan dárigerler keńesine nazar qoıyp, karantın talaptaryn saqtaıyq!