Aıtysker aqyndar «Jaıyq aıtysyna - 60 jyl» tósbelgisimen marapattaldy
ORAL. QazAqparat - Oral qalasyndaǵy H.Bókeeva atyndaǵy oblystyq qazaq drama teatrynda «Jalyndaǵan Jaıyq-jyr» atty respýblıkalyq aqyndar aıtysy ótti. Sondaı-aq ekikúndik shara aıasynda sýyrypsalma óneriniń maıtalmandary «Jaıyq aıtysyna - 60 jyl» tósbelgisimen marapattaldy, dep habarlaıdy QazAqparat tilshisi.
BQO halyq shyǵarmashylyǵy ortalyǵy uıymdastyrǵan Aq Jaıyq aıtysynyń 60 jyldyǵyna arnalǵan jyr dodasyna Astana qalasynan, Mańǵystaý, Aqtóbe, Atyraý, Qyzylorda jáne Batys Qazaqstan oblystarynan barlyǵy 20 aqyn qatysyp, baq synady.
Saıys qorytyndysynda Jánibek aýdany atynan shyqqan Muradym Mırlanov bas júldeni (500 myń teńge) jeńip aldy. Bókeıordalyq Jansaıa Mýsına - birinshi (350 myń teńge), aqjaıyqtyq Meıirman Shákenov pen qyzylordalyq Jibek Shahmardanqyzy ekinshi (200 myń teńge) orynǵa ıe boldy. Oraldyq Orynbek Meńdiqulov pen Mańǵystaý oblysy Jańaózen qalasynan kelgen Arǵynbek Qalbaev úshinshi oryndy bólisti.
Eki kúnge sozylǵan shara barysynda óńirdegi aıtys óneriniń damýy men bolashaǵy týraly «dóńgelek ústel» uıymdastyrylyp, kezinde aıtysqa qatysqan aqyndar «Jaıyq aıtysyna - 60 jyl» tósbelgisimen marapattaldy.
«Budan alpys jyl burynǵy men qazirgi aıtystyń arasy, árıne, jer men kókteı. Aıtystyń deńgeıi joǵarylap, shetinen aıtqysh jastar kóbeıdi. Bul - qazaqtyń aıtys syndy ulttyq óneriniń ólmeıtininiń jarqyn kórinisi», - dedi QazAqparat tilshisine qazylar alqasynyń tóraǵasy, jas kezinde ózi de aıtysqa qatysqan, qazir Almaty qalasynda turatyn jýrnalıstıka salasynyń ardageri, Qazaqstannyń eńbek sińirgen mádenıet qyzmetkeri Ǵarıfolla Kóshenov.
