Aıtys: Jetinshi «Altyn dombyraǵa» Jansaıa Mýsına ıe boldy
ASTANA. QazAqparat - Astanada ótken «Altyn dombyra» respýblıkalyq aqyndar aıtysynda bas júldege batysqazaqstandyq Jansaıa Mýsına ıe boldy, dep habarlaıdy QazAqparat tilshisi.
Eki kúnge sozylǵan dúbirli aıtysta aýzymen qus tistegen kil myqty aqyndar aıtystyń kórkin qyzdyrdy. «Qazaqstan» kontsert zalyn eki kún boıy dúrkiretken aıtys bıyl QR Mádenıet jáne sport mınıstrliginiń uıymdastyrýymen elordanyń 20 jyldyǵyna jáne Táýelsizdik merekesine arnalyp, «Astanam, sensiń aıbarym» taqyrybymen ótti. «Altyn dombyra» aıtysy bıly jetinshi márte ótkizilip otyr.
Aıtysta úshinshi oryndy Rınat Zaıtov, Maqsat Aqanov pen Rústem Qaıyrtaıuly enshiledi. Al ekinshi oryn eki aqynǵa - Meıirbek Sultanhan men Erkebulan Qaınazardyń qanjyǵasynda. Birinshi orynǵa «Aıtystyń aqtańgeri» atanǵan Dıdar Qamıev ıe bolsa, bas júldeni bıyl batysqazaqstandyq Jansaıa Mýsına jeńip aldy. «Altyn dombyra» ıegerine 5 mln teńge berildi.
Eske sala ketsek, Bıyl 7-shi ret ótetin «Altyn dombyra» aıtysyna jyl boıy ótken dodalardyń jeńimpazdary Aıbek Qalıev, Rınat Zaıtov, Rústem Qaıyrtaıuly, Muhtar Nııazov, Aspanbek Shuǵataev, Erkebulan Qaınazarov, Jansaıa Mýsına, Meıirbek Sultanhan, Ásem Erejeqyzy, Maqsat Aqanov, Bolatbek Orazbaev, Dıdar Qamıev, Tólegen Jamanov, Tilegen Ádilov, Nurmat Mansurov, Shalqarbaı Іzbasarov, Qaziret Berdihan, Syrym Ádilbek, Serik Qýanǵan qatarly azýly aqyndar qatysqan bolatyn.
