Aıtýdyń jóni osy dep, bir nárseni qaıtalaı berýge bolmaıdy - Darhan Myńbaı
ASTANA. QazAqparat - Búgin Ulttyq mýzeıde Memleket basshysy Nursultan Nazarbaevtyń bılik ókilettilikterin bólý týraly málimdemesi men Qazaqstan halqyna arnaǵan Joldaýyn talqylaýǵa arnalǵan dóńgelek ústel ótti, dep habarlaıdy QazAqparat.
Jıyndy ashqan Ulttyq mýzeıdiń dırektory Darhan Myńbaı Joldaý men bılik ókilettilikterin bólý týraly úndeýdi halyqqa túsindirý úshin aıtylǵan dúnıelerdi qaıtalaı berýdiń máni joq ekenin atap ótti.
«Prezıdenttiń úndeýi men Joldaýy bir-birimen óte baılanysty, bir-birin tolyqtyryp otyrǵan oqıǵalar. Ózderińiz bilesizder, Memleket basshysy úndeýde saıası jańǵyrý baǵytynda bılik ókilettilikterin bólý máselesine toqtaldy. Buǵan qazaqstandyqtar ǵana emes, álem sarapshylary nazar aýdardy. Biraq, qyzyǵýshylyqpen qatar, túsindirýdi qajet etetin ártúrli suraqtar da bar. Bul jerde eń bastysy, úndeýǵe jaı ǵana ún qosyp qana qoıyp, aıtylǵan nárselerdi qaıtalaı berý emes. Keıbir ózekti máselelerdi jurtqa tarqatyp, eldiń kókeıine qonatyndaı etip aıtý kerek. Aıtýdyń jóni osy eken dep, aıtylǵan nárselerdi qaıtalaı berýdiń qajeti joq»,-dedi Darhan Myńbaı.
Al, Joldaýda aıtylǵan máselelerdiń arasynan Ulttyq mýzeı dırektory bilim salasyndaǵy reformalardy qoldaıtynyn aıtty.
«Elbasy óz Joldaýynda memlekettik til men aǵylshyn tilin basymdyq retinde damytý kerek dedi. Endi osyny júzege asyrýdyń tetikterin oılastyrý kerek. Birinshiden, úsh tilde bilim berý júıesine kezeń-kezeńimen kóshý kerek. Ekinshiden, bul reforma bir ǵana tildiń esebinde bolmaýy tıis. Jaqsy oqýlyqtardy aınalymǵa túsirip, bilimdi mamandardy tartqan jón»,-dedi Myńbaı.
