Aıtý da, atqarý da mańyzdy - Senator
Senator Nurtóre Júsip Memleket basshysy «Ádiletti Qazaqstan: bárimiz jáne árqaısymyz úshin. Qazir jáne árdaıym» atty saılaýaldy baǵdarlamasynda elimizdegi agroónerkásiptik keshendi damytý boıynsha jańa mindetter belgilegenin aıtty.
«Aýyl sharýashylyǵy ekonomıkanyń jańa qozǵaýshy kúshine aınalady. Aldaǵy jyldarda aýyl-aımaqty órkendetýge basymdyq beremiz. Biz aýyldyq jerdi jumyspen jappaı qamtý úshin jaǵdaı jasaımyz, aýyl turǵyndarynyń kásipkerlik bastamalaryn qoldaımyz. Turǵyndarǵa jer qoljetimdi bolady. Ol úshin iri jer ıelerinen paıdalanylmaıtyn jer telimderin memleket menshigine qaıtarý jumystaryn jandandyramyz», — delingen saılaýaldy baǵdarlamada.
Memleket basshysy atap ótkendeı, sý únemdeıtin tıimdi tehnologııa engizip, melıoratsııa jáne sýarý júıesin qalpyna keltirý kerek. Sonymen qatar memleket aýyl sharýashylyǵy kooperatıvterin uıymdastyrý boıynsha keń aýqymdy jobany iske asyryp jatyr.
«Kooperatıvter egistikten dúken sóresine deıin ónimdi tikeleı jetkizýshi bolady. Tıimsiz deldaldardan arylamyz», — delingen qujatta.
- Jeńildetilgen lızıng baǵdarlamasy aıasynda sharýalar 40 mlrd teńgege 1 053 kombaın men traktor satyp aldy.
- 2,8 myń birlik mal azyǵyn jınaý tehnıkasyn satyp alýǵa 20 mlrd teńge bólindi.
- 8 mln gektar paıdalanylmaı jatqan jer memleketke qaıtaryldy.
- Aýyl sharýashylyǵy kooperatsııasyn damytý jáne aýyl turǵyndarynyń tabysyn arttyrý maqsatynda «Aýyl amanaty» jobasy júzege asyrylýda. Joba aıasynda respýblıkadaǵy barlyq jeke qosalqy sharýashylyqtyń jartysyn kooperatıvtik kásipkerlikke tartý, shaǵyn nesıe berý esebinen 350 myńnan astam jumys ornyn qurý jáne ótkizý naryǵyna shyǵýdy qamtamasyz etý kózdelip otyr. 1 mln-nan astam aýyl turǵynyn qamtıtyn jobany júzege asyrýǵa barlyǵy 1 trln teńge qarastyrylǵan.
- 2023 jyly respýblıkalyq bıýdjetten 17 myń shaǵyn nesıe berý úshin 100 mlrd teńge bólindi. Bul aýyldyq jerlerde 18 myńnan astam jańa jumys ornyn ashýǵa múmkindik beredi. Búginde Shyǵys Qazaqstan, Qostanaı jáne Pavlodar oblystarynda qarajat tolyǵymen ıgerildi. Basqa óńirlerde jumys jalǵasyp jatyr.
- Eldi sýmen qamtamasyz etýge qatysty ózekti máselelerdi sheshýdi kózdeıtin jańa Sý kodeksiniń jobasy ázirlendi. Joba sýmen jabdyqtaý, sý burý, sýarý máseleleri, sý sharýashylyǵy nysandarynyń qaýipsizdigi sııaqty kóptegen baǵyttardy qamtıdy.
- Eldiń sý sharýashylyǵy júıesin jańǵyrtý jumystary jalǵasyn taýyp keledi. Máselen, 2025 jylǵa deıin Jambyl, Qyzylorda, Almaty, Aqmola jáne Batys Qazaqstan oblystarynda syıymdylyǵy 1 700 mln m3 bolatyn jańa 9 sý qoımasyn salý josparlanyp otyr. Ony aýyl sharýashylyǵy men ónerkásipte paıdalaný josparlanǵan.
Ekinshi kezeńde Aqtóbe, Qyzylorda, Shyǵys Qazaqstan jáne Qaraǵandy oblystarynda 705 mln m3 astam sýǵa arnalǵan 11 sý qoımasyn salý qarastyrylǵan.
Sonymen qatar respýblıkadaǵy sýarmaly aýyl sharýashylyǵy alqaptarynyń jalpy aýdanyn 1,8 mln gektardan 2,5 mln gektarǵa deıin ulǵaıtý, qoldanystaǵy 15 sý qoımasy men 3,5 myń shaqyrym sýarý jelilerin kúrdeli jóndeý, sondaı-aq 212 kanaldyń sýdy esepke alý júıesin tsıfrlandyrý josparlanyp otyr.
