Aıtyskerler de bar - depýtat «túpsanany túzetkishterge» shúılikti
ASTANA. KAZINFORM – Májilis depýtaty Jarqynbek Amantaıuly Premer-mınıstrdiń orynbasary Tamara Dúısenovanyń atyna áleýmettik jeli qoldanýshylarynyń jaýapkershiligin arttyrý týraly saýal joldady.
«Qoǵamdy dúrliktirgen taǵy bir mańyzdy másele – áleýmettik jelilerdegi arzan aqyl, sapasyz bilim satqysh, bilgishterdiń kóbeıýi. Baıqap qarasaq, áleýmettik jelilerde «baqytqa jetý jolyn kórsetemin, jyldam baıýdy úıretemin, kúızelisten qutqaramyn, túpsanańdy túzetemin, bir aıda juldyzǵa aınaldyramyn, tez aryqtatamyn, shet tilinde saıratyp jiberemin» degen sekildi san túrli kýrs, vebınar, trenıng satýshylar – bloger, bıznes-trener, koých, psıholog, motıvatorlardyń jarnamasy jeldeı esip, saýdanyń kórigin qyzdyrýda», – degen Májilis ókili mundaı unamsyz áreketke shoý-bıznes ókilderimen birge aıtyskerlerdiń de baryp júrgenin atap ótti.
«Olardyń júzdegen myń teńgege baǵalanǵan sabaqtaryn jurt tipti nesıe rásimdep satyp alyp, keıin qaryzǵa belshesinen batyp qalǵany da jasyryn emes. Keıbir derekterde elimizdegi osyndaı ınfobıznestiń jyldyq aınalymy 500 mıllıon dollarǵa jetkeni aıtylǵan. Boljam boıynsha aldaǵy 5 jylda 2 mlrd dollarǵa jetýi múmkin deıdi. Aıtpaqshy, olar memleketke salyq tóleı me ózi?! Tipti mezi bolǵan jurtshylyq olarǵa tyıym salý maqsatynda 2023 jyldyń 23-shi qarashasynda petıtsııa da jarııalaǵan eken. Ókinishke oraı qaraýsyz qalsa kerek», - deıdi depýtat.
Sondaı-aq, ol Úkimet ınfobıznes platformalarynyń mazmuny men ıdeologııasyn jáne zańdylyǵyna, ony júrgizýshilerdiń derekterine monıtorıngti kúsheıtý kerek dep esepteıtinin aıtty.
«Onlaın platforma jáne onlaın jarnama týraly» Zańǵa sáıkes, jaýapkershilikke tartýda ýákiletti organdarǵa tıisti ýákilettik tolyq berilýi tıis. Osy ýaqytqa deıin atalǵan zań aıasynda qansha adam jaýapkershilik júktegeni jaıly statıstıkany ashyp kórsetý mańyzdy.
Bıznes-trenerler men koýchter úshin arnaıy, kásibı standarttar bekitilýi tıis.
Halyq arasynda ınternet alaıaqtardan, ınfosyǵandardan qorǵanýdyń amaldaryn túsindirý jumystaryn keńinen júrgizý qajet», - dedi Jarqynbek Amantaıuly.
